ବୌଦ୍ଧ: ଖାଲ ଢିପ ସାଙ୍ଗକୁ ଜାତୀୟ ରାଜପଥରେ ଉଠା ଦୋକାନୀଙ୍କ ଜବରଦଖଲ । ଖାଲି ସେତିକି ନୁହେଁ ରାସ୍ତାରେ ଉପରେ ମାଳମାଳ ଗାଈଗୋରୁଙ୍କ ଭିଡ । ବୌଦ୍ଧ ଜିଲ୍ଲାକୁ ଦେଇ ଯାଇଥିବା 57 ନଂ ଜାତୀୟ ରାଜପଥରେ ସଙ୍ଗୀନ ହୋଇପଡିଛି ସଡକ ସୁରକ୍ଷା ବ୍ୟବସ୍ଥା । ବାରିଙ୍ଗ ଠାରୁ ମନମୁଣ୍ଡା ଯାଏଁ 110 କିମିରୁ ଊର୍ଦ୍ଧ୍ବ ଜାତୀୟ ରାଜପଥ ଏବେ ମରଣଯନ୍ତା ପାଲଟିଥିବାବେଳେ ସହରରେ ବାଇପାସ ପାଇଁ ଦାବି ହୋଇଛି ।
ବିଶେଷ କରି ବାଇପାସ ରାସ୍ତା କଥା ଯଦି ବିଚାରକୁ ନିଆଯାଏ, ତେବେ କେବଳ ମନମୁଣ୍ଡା ବାଇପାସ କାର୍ଯ୍ୟ ତ୍ବରାନ୍ବିତ ହୋଇଛି । କିନ୍ତୁ ପୁରୁଣାକଟକ, ବାଉଁଶୁଣୀ ବାଇପାସ ରାସ୍ତା କାମ ଯେମିତି ଶୀଳତଭଣ୍ଡାରକୁ ଚାଲିଗଲା ଭଳି ମନେ ହେଉଛି । ସେପଟେ, ବିଭାଗୀୟ ଯନ୍ତ୍ରୀଙ୍କ ମଧ୍ୟରେ ସମନ୍ବୟ ଅଭାବରୁ ରାଜପଥର ବିଭିନ୍ନ ସ୍ଥାନରେ ଖାଲ ଗାତରେ ସମ୍ପୂର୍ଣ୍ଣ ଭାବେ ବିପଦ ସୃଷ୍ଟି ହୋଇଛି ।
ସହରର ମୁଖ୍ୟ ଏନଏସି ଛକକୁ ଦେଖିଲେ ଏହା କୌଣସି ରାଜପଥ ବୋଲି ଆଦୌ ବିଶ୍ବାସ କରିହେବ ନାହିଁ । ଫଳରେ ଦିନକୁ ଦିନ ବଢିବାରେ ଲାଗିଛି ଦୁର୍ଘଟଣା । ବାଇପାସ ରାସ୍ତା ତୁରନ୍ତ କାର୍ଯ୍ୟକାରୀ କରିବାକୁ ଗତ ସପ୍ତାହରେ ବୌଦ୍ଧ ନାଗରିକ କମିଟି ପକ୍ଷରୁ କନ୍ଧମାଳ ସାଂସଦ ଅଚ୍ୟୁତାନନ୍ଦ ସାମନ୍ତଙ୍କୁ ଏକ ସ୍ମାରକପତ୍ର ମଧ୍ୟ ପ୍ରଦାନ କରାଯାଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
