ବୌଦ୍ଧ: ଖାଉଟି ସାମଗ୍ରୀର ଦରବୃଦ୍ଧି ପ୍ରତିବାଦରେ ରାଜରାସ୍ତାକୁ ଓହ୍ଲାଇଲା ମହିଳା କଂଗ୍ରେସ । ଏଥି ସହିତ ଜିଲ୍ଲାର ଧାନମଣ୍ଡିରେ ଲାଗିରହିଥିବା ସମସ୍ୟା ଓ ଏସଏଚଜି ମହିଳାଙ୍କ ଋଣଛାଡ ପାଇଁ ଦାବି କରିଛନ୍ତି ।
ବୌଦ୍ଧ ଜିଲ୍ଲା କଂଗ୍ରେସ ଓ ମହିଳା କଂଗ୍ରେସ ପକ୍ଷରୁ ଆଜି ଅଭିନବ ଶୈଳୀରେ ଖାଉଟି ସାମଗ୍ରୀ ଦରବୃଦ୍ଧିର ପ୍ରତିବାଦ କରାଯାଇଛି । ବୌଦ୍ଧ ଜିଲ୍ଲା ମହିଳା କଂଗ୍ରେସ ପକ୍ଷରୁ ଥାଳି ବାଡେଇ ରାଜରାସ୍ତା ମଝିରେ ଗ୍ୟାସ ଟାଙ୍କି ରଖି ବିକ୍ଷୋଭ ପ୍ରଦର୍ଶନ କରିଛନ୍ତି । ବୌଦ୍ଧ ଜିଲ୍ଲାର ମହିଳା କଂଗ୍ରେସ କର୍ମୀମାନେ ଆଜି ଥାଳି ବାଡେଇ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ଚେତାବନୀ ଦେବାସହ ବିକ୍ଷୋଭ ପ୍ରଦର୍ଶନ କରିଥିଲେ ।ବୌଦ୍ଧ ସହରର ଏନଏସି ଛକ ଓ ଗାନ୍ଧୀ ଛକ ପ୍ରମୁଖ ସ୍ଥାନରେ କଂଗ୍ରେସର ନେତା ଓ କର୍ମୀ ଏକତ୍ରିତ ହୋଇ ବୃଦ୍ଧି ପାଉଥିବା ଖାଉଟି ସାମଗ୍ରୀର ଦରକୁ ନେଇ ଆନ୍ଦୋଳନ କରିଥିଲେ । 57 ନମ୍ବର ଜାତୀୟ ରାଜପଥ ଉପରେ ଗ୍ୟାସ ଟାଙ୍କି ରଖି ମହିଳା ମାନେ ଏହାର ଦରବୃଦ୍ଧିର ପ୍ରତିବାଦ କରିଥିଲେ ।
ସେହିପରି ଜିଲ୍ଲାର ବିଭିନ୍ନ ଧାନମଣ୍ଡିରେ ଲାଗିରହିଥିବା ଅଚଳାବସ୍ଥାକୁ ଦୂର କରିବାକୁ ଦାବି କରାଯିବା ସହ କୋରୋନା ସମୟରେ ପ୍ରଭାବିତ ହୋଇଥିବା ମହିଳା ସ୍ବୟଂ ସହାୟକ ଗୋଷ୍ଠୀର ଋଣଛାଡ କରିବାକୁ ମଧ୍ୟ ଦାବି କରାଯାଇଛି ।
ବୌଦ୍ଧରୁ ସତ୍ୟନାରାୟଣ ପାଣି,ଇଟିଭି ଭାରତ
