ବୌଦ୍ଧ: ଦୁର୍ଗମ ଅଞ୍ଚଳର ଦୁଇ ବିଧବା ଭଉଣୀ ଦୀର୍ଘ ବର୍ଷ ପରେ ମଧ୍ୟ ସାମାଜିକ ସୁରକ୍ଷାରେ ସାମିଲ ହୋଇପାରୁନଥିଲେ । ଏନେଇ ଇଟିଭି ଭାରତରେ ଗତ ସପ୍ତାହରେ ଖବର ପ୍ରସାରିତ ହୋଇଥିଲା । ଏହାକୁ ନେଇ ଜିଲ୍ଲା ପ୍ରଶାସନର ସହଯୋଗରେ ଦୁଇ ଭଉଣୀଙ୍କୁ ତୁରନ୍ତ ସହାୟତା ଯୋଗାଇ ଦେବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।
ସୂଚନା ମୁତାବକ, ବୌଦ୍ଧ ଜିଲ୍ଲା ସଦର ବ୍ଲକ ଟିକରପଡା ପଞ୍ଚାୟତର ଦୁର୍ଗମ ଲକଡପାଜୁ ଗ୍ରାମର କୌଶଲ୍ୟା ଦୀର୍ଘ କୋଡିଏ ବର୍ଷ ଓ ତାଙ୍କ ଭଉଣୀ ଦଶ ବର୍ଷ ହେଲା ସ୍ବାମୀଙ୍କୁ ହରାଇ କଷ୍ଟରେ ରହୁଥିଲେ । ତେବେ ଏହି ଅଞ୍ଚଳ ଅତ୍ୟନ୍ତ ଦୁର୍ଗମ ହୋଇଥିବାରୁ ଏମାନଙ୍କ ଉପରେ କାହାରି ଦୃଷ୍ଟି ପଡୁ ନଥିଲା । ଦୁଇ ବିଧବାଙ୍କ ସମ୍ପର୍କରେ ଗତ ସପ୍ତାହରେ ଇଟିଭି ଭାରତରେ ଖବର ପ୍ରସାରଣ ସହିତ ଦୁଇ ଜଣଙ୍କୁ ପ୍ରଶାସନ ନିକଟରେ ପହଞ୍ଚିବାରେ ସହାୟତା କରିଥିଲା । ଶେଷରେ ଦୁଇ ଭଉଣୀଙ୍କ ଦୁଃଖ ଜିଲ୍ଲାପାଳ ଶୁଣିଲେ ।
ଜିଲ୍ଲାପାଳ ଲଲାଟେନ୍ଦୁ ମିଶ୍ର ଦୁଇ ବିଧବାଙ୍କୁ ସାମାଜିକ ସୁରକ୍ଷା ଅନ୍ତର୍ଗତ ସରକାରୀ ସହାୟତା ତୁରନ୍ତ ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ। ଯାହାକୁ ବିଭିନ୍ନ ମହଲରୁ ସ୍ବାଗତ କରାଯାଇଛି । ସେପଟେ ଏଭଳି ଅସହାୟ ତଥା ବୃଦ୍ଧ ବୃଦ୍ଧାଙ୍କୁ ସ୍ବାସ୍ଥ୍ୟ ସେବା ଯୋଗାଇଦେବା ଲକ୍ଷ୍ୟରେ ବିଶ୍ବ ଜୀବନ ସେବା ସଂଘ ଜିଲ୍ଲା ପ୍ରଶାସନ ସହଯୋଗରେ ଭ୍ରାମ୍ୟମାଣ ହେଲଥ ୟୁନିଟର ଶୁଭାରମ୍ଭ କରାଯାଇଛି ।
