ବୌଦ୍ଧ: ଜିଲ୍ଲାପାଳ ଓ ଏସପିଙ୍କ ଜନଶୁଣାଣୀ ବେଳେ ମାଣ୍ଡିଆରୁ ପ୍ରସ୍ତୁତ ବିଭିନ୍ନ ଖାଦ୍ୟ ସାମଗ୍ରୀ ପ୍ରଦର୍ଶିତ ହୋଇଥିଲା । ମାଣ୍ଡିଆରୁ ପ୍ରସ୍ତୁତ ବିଭିନ୍ନ ଖାଦ୍ୟ ସାମଗ୍ରୀ ଓ ସୁସ୍ବାଦୁ ପାନୀୟ ଅତିଥିଙ୍କୁ ବେଶ୍ ଆକର୍ଷିତ କଲା । ଜିଲ୍ଲାପାଳ ଖୋଦ ମାଣ୍ଡିଆ କେକ୍ ଖାଇବା ସହିତ ନିଜ ସହକର୍ମୀଙ୍କୁ ଖୁଆଇଲେ ।
ରାଜ୍ୟ ସରକାରଙ୍କ ମିଲେଟ ମିଶନ ବା ମାଣ୍ଡିଆ ମିଶନ ଏକ ଆକାଂକ୍ଷୀ ଯୋଜନା ହୋଇଥିବା ବେଳେ ବୌଦ୍ଧ ଜିଲ୍ଲାରେ ଏହାର ଏକ ବିରାଟ ସମ୍ଭାବନା ରହିଛି । ମାଣ୍ଡିଆ ମିଶନ ମାଧ୍ୟମରେ ବିଭିନ୍ନ ବର୍ଗର ହିତାଧିକାରୀଙ୍କୁ ଯୋଡିବାକୁ ଜିଲ୍ଲା ପ୍ରଶାସନ ଉଦ୍ୟମ ଆରମ୍ଭ କରିଛି । ବିଶେଷ ଭାବରେ ହରଭଙ୍ଗା, ବୌଦ୍ଧ ଓ କଣ୍ଟାମାଳ ବ୍ଲକରେ ଏହି ମାଣ୍ଡିଆ ଚାଷ ପାଇଁ ଚଳିତ ବର୍ଷ ଚାଷୀଙ୍କୁ ସ୍ବତନ୍ତ୍ର ତାଲିମ ତଥା ସରକାରୀ ସହାୟତା ଯୋଗାଇ ଦିଆଯାଇଛି । ସୋମବାର ଜିଲ୍ଲାପାଳ ଓ ଏସପିଙ୍କ ବୌଦ୍ଧ ବ୍ଲକ ଠାରେ ଜନଶୁଣାଣୀ ଥିବାବେଳେ ମିଶନ ଶକ୍ତି ଓ ମିଲେଟ ମିଶନ ମିଳିତ ଭାବରେ ପ୍ରଥମଥର ପାଇଁ ମାଣ୍ଡିଆରୁ ପ୍ରସ୍ତୁତ ବିଭିନ୍ନ ଖାଦ୍ୟ ସାମଗ୍ରୀର ପ୍ରଦର୍ଶନ କରିଥିଲେ ।
ମାଣ୍ଡିଆରୁ ପ୍ରସ୍ତୁତ ପେଟିସ, ଲଡୁ, କେକ, ବିସ୍କୁଟ, ମଣ୍ଡା, କାକରା, ଆରିଶା, ହାଲୁଆ ଭଳି ବିଭିନ୍ନ କିସମର ଖାଦ୍ୟ ସହିତ ମିଲେଟ ପ୍ରସ୍ତୁତ ସେକ୍, ଜୁସ, ସରବତ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ସାଜିଥିଲା । ଖୋଦ ବୌଦ୍ଧ ଜିଲ୍ଲାପାଳ ସତ୍ୟ ରଞ୍ଜନ ସାହୁ ଓ ଏସପି ପ୍ରହଲ୍ଲାଦ ସହାୟ ମୀନା ଆଗ୍ରହର ସହିତ ଏସବୁ ଖାଦ୍ୟ ଖାଇଥିଲେ । ଜିଲ୍ଲାରେ ମାଣ୍ଡିଆ ଚାଷ ସହିତ ଏଥିରୁ ଉତ୍ପାଦିତ ସାମଗ୍ରୀର ବେଶ୍ ସମ୍ଭାବନା ରହିଥିବା ବେଳେ ମହିଳା ଗୋଷ୍ଠୀମାନେ ମଧ୍ୟ ଏଭଳି ଖାଦ୍ୟ ପ୍ରସ୍ତୁତ କରି ଆତ୍ମନିର୍ଭର ହେବାର ଆଶା ପ୍ରକଟ କରିଛନ୍ତି ।
ଇଟିଭି ଭାରତ, ବୌଦ୍ଧ
