ବୌଦ୍ଧ: ଯୋଗାଯୋଗର ସୁବ୍ୟବସ୍ଥା ପ୍ରତିଶ୍ରୁତି ଦେଇ ତିନି ତିନି ଜଣ ଜିଲ୍ଲାପାଳ ବଦଳି ହୋଇ ସାରିଲେଣି । ହେଲେ ବଦଳି ପାରୁନି ଓଲଣ୍ଡାବାସୀଙ୍କ ଯାତାୟତର ଦୁଃଖ । ଏଭଳି କିଛି କାହାଣୀ ବୟାନ କରୁଛି ଓଲଣ୍ଡା ଗ୍ରାମରେ ଲାଗିଥିବା ପ୍ରତିଶ୍ରୁତି ଫଳକରୁ ।
ବୌଦ୍ଧ ଜିଲ୍ଲା ବଢିଗାଁ ପଞ୍ଚାୟତର ଓଲଣ୍ଡା ଠାରୁ ସାଲୁଙ୍କୀ ନଦୀର ଅପର ପାର୍ଶ୍ବରେ ଥିବା ପାଞ୍ଚଟି ପଞ୍ଚାୟତକୁ ଯୋଗାଯୋଗ ନିମନ୍ତେ ଅତ୍ୟନ୍ତ ଜରୁରୀ ଥିବା ବ୍ରିଜ ଗତ ପ୍ରାୟ ଦେଢବର୍ଷ ତଳେ ବିଜୁ ସେତୁ ଯୋଜନାରେ ନିର୍ମାଣ କରାଯାଇଥିଲା । ଏହାର ଉଦଘାଟନ ମଧ୍ୟ ହେଲା ।
କିନ୍ତୁ ଗ୍ରାମ୍ୟ ଉନ୍ନୟନ ବିଭାଗର ଠିକାଦାରଙ୍କ ମଧୁଚନ୍ଦ୍ରିକା ଯୋଗୁଁ ପୋଲର ଦୁଇ ପାର୍ଶ୍ଵରେ ଏବେ ମାଟି ଧୋଇଯାଇ ଖାଇ ଯିବାକୁ ବସିଲାଣି । ଫଳରେ ପ୍ରତ୍ୟେକ ଦିନ ଛୋଟ ବଡ ଦୁର୍ଘଟଣା ଘଟୁଛି । ଏପଟେ ଏହି ବ୍ରିଜକୁ ସଂଯୋଗ କରୁଥିବା ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି ।
ଫଳରେ ରୋଗୀସେବା, ଛାତ୍ରଛାତ୍ରୀ ଓ ଜରୁରୀ ସେବା ଅଧିକାଂଶ ସମୟରେ ବାଧାପ୍ରାପ୍ତ ହେଉଥିବା ଅଭିଯୋଗ ହୋଇଛି । ତୁରନ୍ତ ଜିଲ୍ଲା ପ୍ରଶାସନ ଏଦିଗରେ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
