ବୌଦ୍ଧ: ଆଜି ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ତିରୋଧାନ ଦିବସ । ପ୍ରବାଦ ପୁରୁଷ ବିଜୁବାବୁଙ୍କୁ ସ୍ମରଣ କଲା ସାରା ଜିଲ୍ଲା । ସୂଚନା ଲୋକ ସମ୍ପର୍କ ତଥା ଜଙ୍ଗଲ ମନ୍ତ୍ରୀ ବିଜୁବାବୁଙ୍କ ସ୍ମୃତି ଚାରଣ କରିବା ସହିତ ମହାନଦୀରେ ତିଳ ତର୍ପଣ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ।
ଝଡର ଇଗଲ ପ୍ରବାଦ ପୁରୁଷ ବିଜୁବାବୁଙ୍କୁ ସ୍ମରଣ କଲା ସାରା ଜିଲ୍ଲା । ଜିଲ୍ଲାର ବିଭିନ୍ନ ସ୍ଥାନରେ ଏହି ମହାନ ଜନ ନାୟକଙ୍କୁ ସ୍ମରଣ କରାଯିବା ସହିତ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଆଜି ବିଜୁବାବୁଙ୍କ ପବିତ୍ର ଶ୍ରାଦ୍ଧ ଦିବସରେ ମହାନଦୀରେ ତିଳ ତର୍ପଣ କାର୍ଯ୍ୟକ୍ରମ ସହିତ ଜିଲ୍ଲା ସଦର ମହକୁମାରେ ଥିବା ତାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା ।
ବୌଦ୍ଧ ଉପଖଣ୍ଡକୁ ଏକ ସ୍ବତନ୍ତ୍ର ଜିଲ୍ଲାର ମାନ୍ୟତା ପ୍ରଦାନ କରିଥିବା ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୟାନନ୍ଦ ପଟ୍ଟନାୟକଙ୍କ 26ତମ ଶ୍ରାଦ୍ଧ ବାର୍ଷିକୀ ଅବସରରେ ଆଜି ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ବିଜୁବାବୁଙ୍କୁ ସ୍ମରଣ କରାଯାଇଥିଲା । ଚନ୍ଦ୍ରଚୂଡ ମନ୍ଦିର ନିକଟସ୍ଥ ଚିରଘାଟରେ ବିଜେଡି ଦଳ ପକ୍ଷରୁ ବିଜୁବାବୁଙ୍କ ଉଦ୍ଦେଶ୍ୟରେ ତିଳ ତର୍ପଣ କରାଯାଇଥିଲା ।ଏହାଛଡା ମହାନଦୀ ସେତୁ ଛକ ନିକଟରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା ।
ଏହା ମଧ୍ୟ ପଢନ୍ତୁ: ବିଜୁ ପଟ୍ଟନାୟକଙ୍କ ତିରୋଧାନ ଦିବସ ପାଳିଲା କଳାହାଣ୍ଡି ବିଜେଡି, ନୂଆ ଓଡିଶା ଗଠନ ପାଇଁ ନେଲେ ଶପଥ
ଜିଲ୍ଲା ବିଜୁ ଜନତା ଦଳ ପକ୍ଷରୁ ସ୍ଥାନୀୟ ବାତ୍ୟା ଆଶ୍ରୟ ସ୍ଥଳୀରେ ଏକ ସ୍ମୃତି ସଭାର ମଧ୍ୟ ଆୟୋଜନ କରାଯାଇଥିଲା । ଏହି ଅବସରରେ କେତେକ କୃତି ଛାତ୍ରଛାତ୍ରୀ ଓ ବିଜୁବାବୁଙ୍କ ସହ କାମ କରିଥିବା ବିଜେଡି କର୍ମୀଙ୍କୁ ସମ୍ମାନିତ କରାଯାଇଥିଲା । ବିଜୁବାବୁଙ୍କ ବୌଦ୍ଧ ଜିଲ୍ଲା ସହିତ ନିବିଡ ସମ୍ପର୍କ ରହିଥିଲା । ବୌଦ୍ଧଠାରୁ ହିଁ ଏକଦା ବିଜୁବାବୁ ପଶ୍ଚିମ ଓଡ଼ିଶାରେ ପଦଯାତ୍ରାର ଶୁଭାରମ୍ଭ କରିଥିଲେ । ଏହା ଛଡା ବାଘନଦୀ କୂଳରେ ବାଉଁଶୁଣୀର ଡାକ ବଙ୍ଗଳା ଥିଲା ବିଜୁବାବୁଙ୍କ ପ୍ରିୟ ଡାକ ବଙ୍ଗଳା ।ଯାହା ବର୍ତ୍ତମାନ ଧ୍ବଂସ ସ୍ତୁପରେ ପରିଣତ ହେବାକୁ ଯାଉଛି । ତେବେ ଏହି ମହାନ ଜନନାୟକଙ୍କ ବୌଦ୍ଧ ସ୍ଥିତ ପ୍ରତିମୂର୍ତ୍ତିରେ ସଂଧ୍ୟା ହେଲେ ଅନ୍ଧକାର ରାଜୁତି କରୁଥିବାରୁ ବିଜୁ ପ୍ରେମୀଙ୍କ ମଧ୍ୟରେ ଗଭୀର ଦୁଃଖ ପ୍ରକାଶ ପାଇଛି ।
ଇଟିଭି ଭାରତ, ବୌଦ୍ଧ
