ବୌଦ୍ଧ: ପୂର୍ବ ଶତ୍ରୁତା ତଥା ପ୍ରେମ ବ୍ୟାପାରକୁ ନେଇ ଯୁବକଙ୍କୁ ହତ୍ୟା ଅଭିଯୋଗ । ଆଜି ବୌଦ୍ଧ ଥାନା ଅନ୍ତର୍ଗତ ସରସରା ପଞ୍ଚାୟତ ରାଧାବାହାଲ ସେତୁ ନିକଟରେ ଜଣେ ଯୁବକକୁ ହତ୍ୟା କରି ଦୁର୍ଘଟଣାର ରୂପ ଦେବାକୁ ଚେଷ୍ଟା କରାଯାଇଛି । ଯୁବକ ଜଣକ ନିଜର ଜଣେ ସମ୍ପର୍କୀୟ ବିବାହିତା ମହିଳାଙ୍କୁ ପ୍ରେମ କରି ରାଧାନଗର ଠାରେ ରହୁଥିଲେ ।
ତେବେ ଏହାକୁ ତାଙ୍କ ନିଜର କିଛି ସମ୍ପର୍କୀୟ ବିରୋଧ କରି ଆସୁଥିଲେ । ଗତକାଲି ସଂଧ୍ୟାରୁ ଯୁବକ ଜଣକ ନିଖୋଜ ଥିବାବେଳେ ଆଜି ସକାଳୁ ତାଙ୍କ ମୃତଦେହ ଜାତୀୟ ରାଜପଥ କଡରେ ରକ୍ତାକ୍ତ ଅବସ୍ଥାରେ ମିଳିଥିଲା । ଘଟଣାସ୍ଥଳରେ ବୌଦ୍ଧ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସେପଟେ ବୌଦ୍ଧ ଜିଲ୍ଲା ବାଉଁଶୁଣୀ ଥାନା ଅନ୍ତର୍ଗତ ଗୁଡପଡା ଗ୍ରାମରେ ଗତ ମାସରେ ଘଟିଥିବା ଜୟରାମ ବନଛୋର ମୃତ୍ୟୁକୁ ଆତ୍ମହତ୍ୟା ବୋଲି ପୋଲିସ ତଦନ୍ତ କରୁଥିବାବେଳେ ପରିବାର ପକ୍ଷରୁ ଏହା ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ ହୋଇଥିଲା । ଏ ସମ୍ପର୍କରେ କ୍ରାଇମବ୍ରାଞ୍ଚ ପକ୍ଷରୁ ବୌଦ୍ଧ ଏସପିଙ୍କୁ ସବିଶେଷ ତଥ୍ୟ ପାଇଁ ଚିଠି ଲେଖିଥିବା ଜଣାପଡିଛି । ସେପଟେ ମନମୁଣ୍ଡା ଥାନା ଅନ୍ତର୍ଗତ ମନୁପାଲି ପଞ୍ଚାୟତରେ ଏକ ବନ୍ଧରେ ମାଛ ଚାଷକୁ ନେଇ ଦୁଇ ଗୋଷ୍ଠୀ ମୁହାଁମୁହିଁ ହୋଇଥିବା ସୂଚନା ମିଳିଛି । ଲକଡାଉନ ସମୟରେ ଜିଲ୍ଲାରେ ଅପରାଧିକ ମାମଲା ବୃଦ୍ଧି ପାଉଥିବାରୁ ବିଭିନ୍ନ ମହଲରେ ଚିନ୍ତା ପ୍ରକାଶ ପାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
