ବୌଦ୍ଧ: ବୟସ୍କ ଲୋକଙ୍କ ପାଇଁ ସରକାରଙ୍କ ବହୁ ଯୋଜନା । ହେଲେ ସରକାରୀ ସହାୟତାଠୁ ଖୁବ ଦୂରରେ ବୌଦ୍ଧ ମୁଣ୍ଡିପଦର ପଞ୍ଚାୟତ ଅନ୍ତର୍ଗତ ରାଉତବାହାଲ ଗାଁର ଗୁପ୍ତେଶ୍ବର ପ୍ରଧାନ । ନା ମିଳୁଛି ବାର୍ଦ୍ଧକ୍ୟ ଭତ୍ତା ନା ରହିବା ପାଇଁ ଘର ଖଣ୍ଡିଏ । ସେପଟେ ଅନେକ ରାଜନେତା, ପଞ୍ଚାୟତ ଅଧିକାରୀଙ୍କ ପାଖକୁ ଦୀର୍ଘ 20 ବର୍ଷ ହେଲାଣି ଦୌଡି ଦୌଡି ନୟାନ୍ତ ହେଲେଣି ଏହି ଅସହାୟ ବୃଦ୍ଧ ।
ଗୁପ୍ତେଶ୍ବରଙ୍କ ବୟସ 80 ବର୍ଷ । ବହୁ ଦିନ ପୂର୍ବରୁ ସ୍ତ୍ରୀ ମଧ୍ୟ ଆରପାରିକୁ ଚାଲିଗଲେଣି । ଆଉ ଦୁଇ ଦୁଇଟି ପୁଅ ଥାଇ ବି ବୃଦ୍ଧ ବାପାଙ୍କୁ ଏକା ଛାଡି ଦେଇଛନ୍ତି । ବୟସାଧିକ ହେତୁ ଠିକରେ ଚାଲିବୁଲି ମଧ୍ୟ ପାରୁ ନାହାଁନ୍ତି । ଫଳରେ ଅସହାୟ ଅବସ୍ଥାରେ ବୃଦ୍ଧ ଗୁପ୍ତେଶ୍ବର ଏବେ ଏକ ଗୁହାଳ ଘରେ ଆଶ୍ରୟ ନେଇ ଶେଷ ଜୀବନ କାଟୁଛନ୍ତି । ଆଉ ସବୁଠାରୁ ଆଶ୍ଚର୍ଯ୍ୟର କଥା ଏତେ ବୟସ୍କ ବୃଦ୍ଧଙ୍କୁ ଆଜିଯାଏ କୌଣସି ସରକାରୀ ଯୋଜନାରେ ସାମିଲ କରାଯାଇ ନାହିଁ ।
ଯେଉଁଠାରେ ବୃଦ୍ଧଙ୍କୁ ବାର୍ଦ୍ଧକ୍ୟ ଭତ୍ତା ପାଇଁ କୋଡିଏ ବର୍ଷ ର ସଂଘର୍ଷ କରିବାକୁ ପଡୁଛି ସେଠାରେ ପକ୍କାଘର ଏକପ୍ରକାର ସ୍ବପ୍ନ ହୋଇପଡିଛି। ତେବେ ତୁରନ୍ତ ଏହି ଅସହାୟ ବୃଦ୍ଧ ଙ୍କୁ ସରକାରୀ ସହାୟତା ଦେବା ସହ ପକ୍କାଘର ଖଣ୍ଡେ ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି ।
ବୌଦ୍ଧ ରୁ ସତ୍ୟ ନାରାୟଣ ପାଣି, ଈଟିଭି ଭାରତ
