ବୌଦ୍ଧ: ଗୋଟିଏ କୋଠରୀ ମଧ୍ୟରେ ଚାଲିଛି ଛାତ୍ରଛାତ୍ରୀଙ୍କ ଭବିଷ୍ୟତ ଗଢା । ଏଭଳି ଦୃଶ୍ୟ ଦେଖିବାକୁ ମିଳିଛି ବୌଦ୍ଧ ଜିଲ୍ଲା ଡାଙ୍ଗପଡା ଗାଁର ପ୍ରାଥମିକ ବିଦ୍ୟାଳୟରେ ।
ବୌଦ୍ଧ ପଞ୍ଚାୟତ ସମିତି କାର୍ଯ୍ୟାଳୟ ଠାରୁ ମାତ୍ର ଗୋଟିଏ କିଲୋମିଟର ଦୂରରେ ଅବସ୍ଥିତ ଡାଙ୍ଗପଡା ଗାଁ । ଏଠାରେ ଥିବା ଏକମାତ୍ର ପ୍ରାଥମିକ ବିଦ୍ୟାଳୟର ଗୋଟିଏ କଠୋରୀରେ ପାଞ୍ଚଟି ଶ୍ରେଣୀର ଛାତ୍ରଛାତ୍ରୀଙ୍କ ଭବିଷ୍ୟତ ଗଢା ଚାଲିଛି । ଗାଁରେ ଅଙ୍ଗନବାଡି କେନ୍ଦ୍ରର ଗୃହ ନଥିବାରୁ ବିଦ୍ୟାଳୟ ବରଣ୍ଡାରେ ଅଙ୍ଗନବାଡି ଛାତ୍ରଛାତ୍ରୀ ବସୁଥିବା ବେଳେ ଗୋଟିଏ କଠୋରୀରେ ପାଠ ପଢୁଛନ୍ତି ପ୍ରଥମରୁ ପଞ୍ଚମ ଶ୍ରେଣୀର ପ୍ରାୟ ଚାଳିଶ ଜଣ ଛାତ୍ରଛାତ୍ରୀ ।
ଏଠାରେ ଗୋଟିଏ ମାତ୍ର ଶ୍ରେଣୀଗୃହ ଥିବାରୁ ତାହା ମଧ୍ୟରେ ମଧ୍ୟାହ୍ନ ଭୋଜନର ଡାଲି, ଚାଉଳ, ପନିପରିବା, ଲାଇବ୍ରେରୀ ବହି ଓ ଅନ୍ୟାନ୍ୟ ସାମଗ୍ରୀ ମଧ୍ୟରେ ପିଲାଙ୍କ ପାଠପଢା ହୋଇଥାଏ । ସେପଟେ ଏହି ବିଦ୍ୟାଳୟରେ ମାତ୍ର ଦୁଇ ଜଣ ଶିକ୍ଷକ ଶିକ୍ଷୟିତ୍ରୀ । ଯାହାଫଳରେ ଜଣେ ଶିକ୍ଷକ ଛୁଟିରେ ରହିଲେ ଆଉ ଜଣେ ଶିକ୍ଷକ ସମସ୍ତ ପ୍ରଥମରୁ ପଞ୍ଚମ ଶ୍ରେଣୀର ଛାତ୍ରଛାତ୍ରୀଙ୍କୁ ପାଠ ପଢାଇଥାନ୍ତି ।
ଏ ସମ୍ପର୍କରେ ବିଦ୍ୟାଳୟ ପରିଚାଳନା କମିଟି ପକ୍ଷରୁ ପ୍ରଶାସନକୁ ବାରମ୍ବାର ଲିଖିତ ଭାବେ ସମସ୍ୟା ସମ୍ପର୍କରେ ଜଣାଯାଇଛି । କିନ୍ତୁ କୌଣସି ସୁଫଳ ମିଳି ପାରିନାହିଁ । ଏ ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଛାତ୍ରଛାତ୍ରୀଙ୍କ ଭବିଷ୍ୟତ ପାଇଁ ନୂତନ ଶ୍ରେଣୀଗୃହ ନିର୍ମାଣ କରିବା ପାଇଁ ଗ୍ରାମବାସୀ ଦାବୀ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
