ବୌଦ୍ଧ : ବୌଦ୍ଧରେ ମର୍ମନ୍ତୁଦ ସଡକ ଦୁର୍ଘଟଣା। ଅଳ୍ପକେ ବର୍ତ୍ତିଲେ 20ରୁ ଉର୍ଦ୍ଧ୍ବ ଯାତ୍ରୀ । ଏକ ଯାତ୍ରୀବାହୀ ବସକୁ ପଛରୁ ଏକ ଟ୍ରକ ବାଡେଇ ହେବାରୁ ପ୍ରାୟ କୋଡିଏ ଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି । ତେବେ ଜିଲ୍ଲା ଦେଇ ଯାଇଥିବା 57 ନମ୍ବର ଜାତୀୟ ରାଜପଥରେ ବାରମ୍ବାର ସଡକ ଦୁର୍ଘଟଣା ଘଟୁଥିବାରୁ ଏନେଇ ଗଭୀର ଉଦବେଗ ପ୍ରକାଶ ପାଇଛି ।
ବୌଦ୍ଧ ଜିଲ୍ଲା ଦେଇ 57 ନମ୍ବର ଜାତୀୟ ରାଜପଥରେ ପ୍ରତ୍ୟେକ ଦିନ ଛୋଟ ବଡ ଦୁର୍ଘଟଣା ଘଟୁଥିବା ବେଳେ ମଙ୍ଗଳବାର ପ୍ରତ୍ୟୁଷରୁ ଘଟିଛି ଆଉ ଏକ ସଡକ ଦୁର୍ଘଟଣା । ଜିଲ୍ଲାର ଚାରିଛକ ଠାରେ ହରଭଙ୍ଗା ତହସିଲ କାର୍ଯ୍ୟାଳୟ ନିକଟରେ ଏହି ଦୁର୍ଘଟଣା ଘଟିଥିବା ବେଳେ ପୁରୁଣା କଟକ ପୋଲିସ ଓ ଚାରି ଛକ ଅଗ୍ନିଶମ ବିଭାଗ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲେ । ତେବେ ସୂଚନା ମୁତାବକ ସାହିଲ ନାମକ ଏକ ଯାତ୍ରୀବାହୀ ଘରୋଇ ବସ ବଡମ୍ବାଠାରୁ ବୌଦ୍ଧ ଦେଇ ବଲାଙ୍ଗୀର ଅଭିମୁଖେ ଯାଉଥିଲା । ବସର ଯାତ୍ରୀମାନେ ବିଶ୍ରାମ ପାଇଁ ଚାରିଛକଠାରେ ଅଟକାଇ ଥିଲେ । ହେଲେ ବସଟି ତହସିଲ କାର୍ଯ୍ୟାଳୟ ନିକଟରେ ଅଟକି ଥିବା ବେଳେ ବର୍ଷା ପାଗ ଯୋଗୁଁ ପଛ ପଟରୁ ଏକ ଟ୍ରକ ବସକୁ ଧକ୍କା ଦେଇଥିଲା । ଫଳରେ ବସଟି ରାସ୍ତା ତଳକୁ ପ୍ରାୟ ତିନି ଫୁଟ ତଳକୁ ଖସି ପଡିଥିଲା ।
