ବୌଦ୍ଧ: ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକର ଚରମ ଶିଖରରେ ପହଞ୍ଚିଛି ଦୁର୍ନୀତି । ଏହି ଦୁର୍ନୀତି ଫର୍ଦ୍ଦରେ ଭୂତ ରାସ୍ତା ନାଁରେ ଦୁଇ ଲକ୍ଷ ଟଙ୍କା ଆତ୍ମସାତ ଭଳି ସାଙ୍ଘାତିକ ଅଭିଯୋଗ ଆସିଛି । ଏନେଇ ଜିଲ୍ଲା ପ୍ରଶାସନ, ରାଜନୈତିକ ଦଳ ଓ ଭିଜିଲାନ୍ସ ବିଭାଗ ଅଳ୍ପ ବହୁତ ଜ୍ଞାତରେ ଥିଲେ ମଧ୍ୟ କଡା ପଦକ୍ଷେପ ନିଆଯାଉ ନଥିବାରୁ ଦିନକୁ ଦିନ ବ୍ଲକରେ ଦୁର୍ନୀତି ବଢ଼ିବାରେ ଲାଗିଛି ।
ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକ ଅନ୍ତର୍ଗତ ପୀତାମ୍ବରପୁର ପଞ୍ଚାୟତ ସଦର ଠାରୁ ଜିରାଡ ପର୍ଯ୍ୟନ୍ତ ଏକ ରାସ୍ତା ନାଁରେ ଦୁଇ ଲକ୍ଷ ଟଙ୍କା ହଡପ ଅଭିଯୋଗ କରିଛନ୍ତି ପଞ୍ଚାୟତବାସୀ । ସୂଚନା ଅଧିକାରରୁ ମିଳିଥିବା ତଥ୍ୟାନୁସାରେ ପୀତାମ୍ବରପୁରଠାରୁ ଜିରାଡ ପର୍ଯ୍ୟନ୍ତ କୌଣସି ସିଧାସଳଖ ସଂଯୋଗ ନଥିବା ବେଳେ କେଉଁ ରାସ୍ତାକୁ ଦେଖାଇ ଏପରି ଫଲ୍ସ ବିଲ କରାଗଲା, ସେ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ।
ସେପଟେ ବିଡିଓ ଆଚରଣବିଧି ଉଠିବା ପରେ ତଦନ୍ତ କରି ପଦକ୍ଷେପ ନେବେ ବୋଲି କହିଛନ୍ତି । କିନ୍ତୁ ଏବେ ପ୍ରଶ୍ନ ଉଠିଛି ଯେ କେଉଁ ଅଦୃଶ୍ୟ ଚାପରେ କିମ୍ବା କାହା କାହାର ପ୍ରରୋଚନାରେ ଏଭଳି ଦୁର୍ନୀତି ହୋଇଛି, ତାର ଏକ ବିଧିବଦ୍ଧ ତଦନ୍ତ ହେବା ଆବଶ୍ୟକ ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
