ବୌଦ୍ଧ: ହରଭଙ୍ଗା ବ୍ଲକରେ କିଡନୀ ରୋଗ ମହାମାରୀ ରୂପ ନେବାକୁ ବସିଲାଣି । କେବଳ ହରଭଙ୍ଗା ବ୍ଲକର ଧଳପୁର ପଞ୍ଚାୟତର ଜବଲପୁର ଗ୍ରାମରେ ଶତାଧିକ ଲୋକଙ୍କ ମୃତ୍ୟୁ ଏହି କିଡନୀ ରୋଗରେ ହୋଇଥିବା ଅଭିଯୋଗ ହୋଇଛି ।
ଗ୍ରାମ ଏବେ ପୁରୁଷ ଶୂନ୍ୟ ହେବା ଅପେକ୍ଷାରେ ରହିଛି । କିନ୍ତୁ ସ୍ବାସ୍ଥ୍ୟ ବିଭାଗ ଏସମ୍ପର୍କରେ ଅବଗତ ଥିଲେ ମଧ୍ୟ ପୁରା ଚୁପଚାପ ବସିଯାଇଛି । ଗ୍ରାମର ଲୋକଙ୍କ ପାଇଁ କୌଣସି ସ୍ବାସ୍ଥ୍ୟଗତ ସମାଧାନ କରିବାରେ ଦୃଷ୍ଟି ଗୋଚର ଦେଉ ନାହିଁ । ବୁଧବାର ଧଳପୁର ପଞ୍ଚାୟତର ସାକୁସିଙ୍ଗା ଗ୍ରାମର ମଙ୍ଗୁଳୁ ସାହୁଙ୍କ ଏହି କିଡନୀ ରୋଗରେ ମୃତ୍ୟୁ ଘଟିଛି । ଏହି ମୃତ୍ୟୁ ସହ ବେସରକାରୀ ଭାବେ କିଡନୀ ମୃତ୍ୟୁ ସଂଖ୍ୟା୧୦୭ରେ ପହଞ୍ଚିଥିବା ଏକ ସ୍ବେଚ୍ଛାସେବୀ ସଂସ୍ଥା ପକ୍ଷରୁ ସୂଚନା ମିଳିଛି ।
ହରଭଙ୍ଗା ବ୍ଲକର ଦଶରୁ ଅଧିକ ପଞ୍ଚାୟତରେ ଏହି ରୋଗ ଏବେ ଗାଁକୁ ଗାଁ ବ୍ୟାପିବା ସହ ମୃତ୍ୟୁର ମରୀଚିକା ପାଲଟିଯାଇଛି । ଏପଟେ ଏହାର କାରଣ ଓ ନିରାକରଣ ଖୋଜିବାରେ ସମ୍ପୂର୍ଣ୍ଣ ଫେଲ ମାରିଛି ସ୍ବାସ୍ଥ୍ୟ ବିଭାଗ । ଏହାଛଡା ମୃତ୍ୟୁ କାଳୀନ କିମ୍ବା ଅସହାୟ ପରିବାରଙ୍କୁ କୌଣସି ସରକାରୀ ସହାୟତା ମିଳୁନଥିବା ମଧ୍ୟ ଅଭିଯୋଗ ହୋଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
