ଭଦ୍ରକ: ସାର୍ଙ୍କ ବଦଳିକୁ ନେଇ ଛାତ୍ରଛାତ୍ରୀଙ୍କ ଧାରଣା । ଆମ ସାରଙ୍କୁ ଫେରାଇ ଆଣିଦିଅ । ଏହି ନାରାରେ କମ୍ପିଲା ଭଦ୍ରକ ଜିଲ୍ଲା ସ୍କୁଲ ପରିସର । ଚଳିତ ଡିସେମ୍ବର 5 ତାରିଖରେ 3 ଜଣ ଶିକ୍ଷକଙ୍କ ବଦଳି ଅନ୍ୟତ୍ର ହୋଇଛି । ଯାହାକୁ ପ୍ରତିବାଦ ଜଣାଇ ବିଦ୍ୟାଳୟ ସମ୍ମୁଖରେ ହୋ ହାଲ୍ଲା କରିବା ସହ ଗେଟରେ ତାଲା ପକାଇଥିଲେ ଛାତ୍ରଛାତ୍ରୀ ।
ଶିକ୍ଷକଙ୍କ ବଦଳିକୁ ବିରୋଧ; ସ୍କୁଲ ଗେଟରେ ତାଲା ପକାଇଲେ ଛାତ୍ରଛାତ୍ରୀ
ଶିକ୍ଷକଙ୍କ ବଦଳକୁ ତୁରନ୍ତ ପ୍ରତ୍ୟାହାର କରିବାକୁ ଦାବି କରିଥିଲେ । ଏହାସହ ଆମ ସାର ଆମକୁ ଦରକାର, ସାର ଆସିଲେ ଆମେ ପାଠ ପଢିବୁ । ନହେଲେ ପଢିବୁ ନାହିଁ ବୋଲି ଛାତ୍ରଛାତ୍ରୀ ସ୍କୁଲ ପରିସରରେ ନାରା ଦେଇଥିଲେ । ଘଟଣା ବିଷୟରେ ଖବର ପାଇ ପ୍ରଧାନ ଶିକ୍ଷକ ପହଞ୍ଚି ଛାତ୍ରଛାତ୍ରୀଙ୍କୁ ବୁଝାସୁଝା କରିବା ପରେ ସେମାନେ ଶାନ୍ତ ହୋଇଥିଲେ । ସେପଟେ ଏନେଇ ବିଭାଗୀୟ ଅଧିକାରୀ କୌଣସି ପ୍ରତିକ୍ରିୟା ପ୍ରକାଶ କରିନାହାନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
