ଭଦ୍ରକ : ନଦୀରେ ମିଶିଲା ୪୦ ଫୁଟର ସାଳନ୍ଦୀ ନଦୀବନ୍ଧ (Salandi River embankment collapsed ) । ଭୟଭୀତ ଗ୍ରାମବାସୀ । ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ଦେଇ ପ୍ରବାହିତ ସାଳନ୍ଦୀ ନଦୀର ନଦୀବନ୍ଧ ଶୀତଳପୁରରେ ୪୦ ଫୁଟ ତଳକୁ ଧସିପଡ଼ିଛି । ଏହାକୁ ଦେଖି ଶୀତଳପୁରବାସୀ ଓ ଆଖପାଖ ଲୋକେ ଭୟଭୀତ ହୋଇପଡ଼ିଛନ୍ତି । ଖବର ଅନୁଯାୟୀ ଯାଜପୁର ଜିଲ୍ଲା ଜଳସମ୍ପଦ ଅଧୀନରେ ଥିବା ଏହି ନଦୀବନ୍ଧରେ ଏବେ ପଥର ପ୍ୟାକିଂ କାମ ଚାଲିଥିଲା । ହେଲେ କୌଣସି କାରଣରୁ ଗତକାଲି(ଶନିବାର) ରାତିରେ ଏହି ନଦୀବନ୍ଧ ଧସିବା ଆରମ୍ଭ ହୋଇଥିଲା ।
ଅଦ୍ୟାବଧି ଏହା 40 ଫୁଟର ନଦୀବନ୍ଧ ନଦୀକୁ ଧସି ଯାଇଥିବା ଜଣାପଡ଼ିଛି । ତେବେ ନିମ୍ନମାନର କାମ ଯୋଗୁଁ ଏଭଳି ନଦୀବନ୍ଧ ଧସି ଯାଇଥିବା ସୂଚନା ମିଳିଛି । ସାଳନ୍ଦୀ ନଦୀରୁ ବାରମ୍ବାର ମାଟି ଅତଡା ଧସୁଥିବା ବେଳେ ଜଳ ସମ୍ପଦ ଏହାର କୌଣସି ପ୍ରତିକାର କରୁନଥିବା ଗାଁ ଲୋକ ଅଭିଯୋଗ କରିଛନ୍ତି । ତେଣୁ ନଦୀ ଭିତରେ ଜାଫର କରି ବା ପଥର ପକାଇ ନଦୀବନ୍ଧ ମରାମତି କରିବାକୁ ଗ୍ରାମବାସୀ ଦାବି କରଛନ୍ତି ।
ଇଟିଭି ଭାରତ, ଭଦ୍ରକ
