ଭଦ୍ରକ: ସହରାଞ୍ଚଳ ଓ ଗ୍ରାମାଞ୍ଚଳରେ ଜଳ ଯୋଗାଣ ବ୍ୟବସ୍ଥାରେ କାର୍ଯ୍ୟରତ ପ୍ରାୟ 10 ହଜାରରୁ ଊର୍ଦ୍ଧ୍ବ କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନ ନେଇ ସରକାରଙ୍କୁ ଚେତାବନୀ ଦେଇଛନ୍ତି । ଓଡ଼ିଶା ପାଇପ ଜଳ ଯୋଗାଣ କର୍ମଚାରୀ ସଂଘ ପକ୍ଷରୁ ସରକାରଙ୍କୁ ଏଭଳି ଚେତାବନୀ ସହ ବିଭିନ୍ନ ଦାବି ପୂରଣ ପାଇଁ ଅପିଲ କରିଛନ୍ତି ।
ଜଳ ଯୋଗାଣ ବ୍ୟବସ୍ଥାରେ ଅସ୍ଥାୟୀ କର୍ମଚାରୀମାନଙ୍କୁ ସ୍ଥାୟୀ ନିଯୁକ୍ତି, ସ୍ଥାୟୀ ନିଯୁକ୍ତି ପର୍ଯ୍ୟନ୍ତ ପୂର୍ବ ନିଷ୍ପତ୍ତି ପ୍ରକାରରେ 100 ଟଙ୍କା ପ୍ରୋତ୍ସାହନ ଭତ୍ତା ପ୍ରଦାନ, ୱାର୍କଚାର୍ଜ କର୍ମଚାରୀଙ୍କୁ ରେଗୁଲାର କର୍ମଚାରୀର ମାନ୍ୟତା ସହ ସ୍ଥିରୀକୃତ ପେନସନ ପ୍ରଦାନ, ଠିକା ଓ ଏସଇଏମ କର୍ମଚାରୀଙ୍କୁ ସର୍ବନିମ୍ନ ମଜୁରୀ ପ୍ରଦାନ ସହ ଇ-ମାଷ୍ଟର ରୋଲ ମାଧ୍ୟମରେ ବେତନ ପ୍ରଦାନ, କୋଭିଡ଼-19 ମହାମାରୀରେ ମୃତ୍ୟୁ ବରଣ କରିଥିବା କର୍ମଚାରୀଙ୍କୁ 50 ଲକ୍ଷ ଟଙ୍କା କ୍ଷତିପୂରଣ ପ୍ରଦାନ, କ୍ୟାଡର ରୁଲ ସଂଶୋଧନ କରାଯାଇ ଅବସରପ୍ରାପ୍ତ କର୍ମଚାରୀଙ୍କୁ ପେନସନ ପ୍ରଦାନ, ଆଉଟସୋର୍ସିଂ କର୍ମଚାରୀଙ୍କ ସର୍ବନିମ୍ନ ଉଚ୍ଚ କୁଶଳୀ ମଜୁରୀ ସହ ଇପିଏଫ୍ ଓ ଇଏସ୍ଆଇ ବ୍ୟବସ୍ଥା ପ୍ରଦାନ, ୱାଟ୍କୋ ସଂସ୍ଥାରେ କାର୍ଯ୍ୟ କରାଯାଇ ଜନସ୍ବାସ୍ଥ୍ୟ ବିଭାଗରୁ ବେତନ ପରିବର୍ତ୍ତେ ୱାଟ୍କୋ ସଂସ୍ଥାରୁ ବେତନ ପ୍ରଦାନ ଆଦି ଦାବି ପୂରଣ ପାଇଁ ଅନୁରୋଧ ହୋଇଛି ।
ଏସବୁ ଦାବି ସମ୍ପର୍କରେ ଦୀର୍ଘ ବର୍ଷ ଧରି ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ଅବଗତ ଥିଲେ ମଧ୍ୟ ଏହାକୁ ପୂରଣ ନେଇ କୌଣସି ପଦକ୍ଷେପ ନିଆଯାଇନାହିଁ । କୋଭିଡ଼ ମହାମାରୀର ଭୟାବହତାକୁ ଦୃଷ୍ଟିରେ ରଖି ରାଜ୍ୟ ସଂଘ ଗତ ମାର୍ଚ୍ଚ ମାସ ଠାରୁ ନିରବଚ୍ଛିନ୍ନ ଭାବରେ ସହରାଞ୍ଚଳ ଓ ଗ୍ରାମାଞ୍ଚଳରେ ଥିବା କ୍ବାରେଣ୍ଟାଇନ ସେଣ୍ଟରକୁ ଜଳଯୋଗାଣ କରିବା ସହିତ ବିଭିନ୍ନ ଚିକିତ୍ସାଳୟକୁ ମଧ୍ୟ ନିରବଚ୍ଛିନ୍ନ ଜଳ ଯୋଗାଣ ବ୍ୟବସ୍ଥାକୁ ସୂଚାରୁ ରୂପେ ସମ୍ପନ୍ନ କରୁଛି । ସରକାର ଜଳ ଯୋଗାଣ ବ୍ୟବସ୍ଥାକୁ ଅତ୍ୟାବଶ୍ୟକ କାର୍ଯ୍ୟ ଭାବେ ବିଚାର କରୁଥିବାବେଳେ ଏହି ବ୍ୟବସ୍ଥାରେ କାର୍ଯ୍ୟ କରୁଥିବା କର୍ମଚାରୀଙ୍କ ଦାବି ପ୍ରତି କର୍ଣ୍ଣପାତ କରୁନାହାଁନ୍ତି । ଫଳରେ ଏହି ବ୍ୟବସ୍ଥାରେ କାର୍ଯ୍ୟ କରୁଥିବା 10 ହଜାରରୁ ଊର୍ଦ୍ଧ୍ବ କର୍ମଚାରୀ ଆଗାମୀ ଦିନରେ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ସଂଘର ଭଦ୍ରକ ଶାଖା ସମ୍ପାଦକ ସନ୍ତୋଷ କୁମାର ପଣ୍ଡା ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ।
ଆସନ୍ତା 16 ତାରିଖରେ ରାଜ୍ୟ ସର୍ବୋଚ୍ଚ ଯନ୍ତ୍ରୀ ଜନସ୍ବାସ୍ଥ୍ୟ ବିଭାଗଙ୍କ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଏବଂ 20 ତାରିଖ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଗଣଧାରଣା ସହ ସ୍ମାରକପତ୍ର ପ୍ରଦାନ କରାଯିବ । ପରେ 23 ତାରିଖରୁ 26 ତାରିଖ ପୂଜା ଛୁଟିରେ ସମସ୍ତ କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ସରକାରଙ୍କୁ ଚେତାବନୀ ଦିଆଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
