ଭଦ୍ରକ: ପୁଣି ଖଟିଆରେ ବୁହାହେଲେ ରୋଗୀ । ଭଦ୍ରକ ଜିଲ୍ଲା ବାସୁଦେବପୁର ବ୍ଲୋକ ବିନୋବାଭାବେ ନଗର ପଞ୍ଚାୟତ ଅନ୍ତର୍ଗତ ମଣ୍ଡଳପଡା ଗ୍ରାମରୁ ଏଭଳି ଘଟଣା ଦେଖିବାକୁ ମିଳିଛି ।
ମଣ୍ଡଳପଡା ଗ୍ରାମର ମହିଳା ଜଣେ ଗୁରୁତର ହେଇପଡିବାରୁ ବିଲ ଭିତରେ କାଦୁଅ ପଚପଚ ରାସ୍ତାରେ ପାଖାପାଖି 2 କିଲୋମିଟର ପର୍ଯ୍ୟନ୍ତ ଏକ ଭାରରେ ବୋହି ଆଣିବା ପରେ ମେଡିକାଲକୁ ଅଣାଯାଇଥିଲା ।
କସିଆ ସାମୁଦ୍ରିକ ଥାନା ଅନ୍ତର୍ଗତ କୃଷ୍ଣପୁର ଅଂଚଳର ବାବୁ ମଣ୍ଡଳଙ୍କ ସ୍ତ୍ରୀ ପାର୍ବତୀ ମଣ୍ଡଳ । ପାର୍ବତୀ ନିଜ ବାପାଙ୍କ ଘରେ ମଣ୍ଡଳପଡାକୁ ଆସିଥିବାବେଳେ ଘରେ ହଠାତ ଗୁରୁତର ହୋଇ ସଂଜ୍ଞାହୀନ ହୋଇପଡିଥିଲେ । ପରିବାର ଲୋକ ଆମ୍ବୁଲାନ୍ସକୁ ଡାକିବାପରେ କାଦୁଅ ପଚପଚ ରାସ୍ତାରେ ଗାଡ଼ି ଯିବାକୁ ମନା କରିଦେଇଥିଲା । ଫଳରେ ବାଧ୍ୟ ହୋଇ ପରିବାର ଲୋକ ଓ ଗ୍ରାମବାସୀ ଏକ ଭାରରେ ବୋହି କଣ୍ଟିଆନାଳି ଛକ ପର୍ଯ୍ୟନ୍ତ ରୋଗୀକୁ ଆଣିଥିଲେ । ପରେ ଏକ ଘରୋଇ ଆମ୍ବୁଲାନ୍ସରେ ରୋଗୀକୁ ମେଡିକାଲ ନିଆଯାଇଥିଲା । ସରକାର ସ୍ବାସ୍ଥ୍ୟକ୍ଷେତ୍ରରେ ଉନ୍ନତି ପାଇଁ ବିଭିନ୍ନ ପ୍ରକାରର ଯୋଜନା କରୁଥିଲେ ମଧ୍ୟ ଲୋକଙ୍କ ପାଖରେ ଠିକ ଭାବରେ ପହଞ୍ଚିପାରୁନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
