ଭଦ୍ରକ: ଜିଲ୍ଲା ବାସୁଦେବପୁର ନିର୍ବାଚନ ମଣ୍ଡଳୀ ତିହିଡି ବ୍ଲକ ମଙ୍ଗଳପୁର ପଞ୍ଚାୟତରେ ପ୍ରଚାର ମୈଦାନକୁ ଓହ୍ଲାଇଛନ୍ତି ଓଡିଶାର ସୁନାମଧନ୍ୟ ଗୀତିକାର ପଞ୍ଚାନନ ନାୟକ । ନିଜ ଭିଟାମାଟି ମଙ୍ଗଳପୁର ଗାଁର ଆରାଧ୍ୟ ଦେବୀ ମା’ ମଙ୍ଗଳାଙ୍କ ପୀଠରେ ପ୍ରଣିପାତ କରି ପ୍ରଚାର ଅଭିଯାନ ଆରମ୍ଭ କରିଛନ୍ତି । ବିଜେପି ସମର୍ଥିତ ସରପଞ୍ଚ ପ୍ରାର୍ଥିନୀ ପୁଷ୍ପିତା ବଳ ଓ ସମିତି ସଭ୍ୟା ପ୍ରାର୍ଥିନୀ ରମାମଣି ମଳିକଙ୍କୁ ବିଜୟର ମୁକୁଟ ପିନ୍ଧାଇବା ପାଇଁ ସେ ପ୍ରଚାରର ମଙ୍ଗ ଧରିଛନ୍ତି ।
ଅବହେଳିତ ଏହି ପଞ୍ଚାୟତକୁ ଏକ ଆଦର୍ଶ ପଞ୍ଚାୟତରେ ପରିଣତ କରିବା ସହ ଏହାର ରୂପରଙ୍ଗଙ୍କୁ ବଦଳେଇବାକୁ ଭୋଟରମାନଙ୍କୁ ଆହ୍ୱାନ କରିଛନ୍ତି ଗୀତିକାର । 2017 ମସିହାରୁ ଏହି ପଞ୍ଚାୟତ ଏକ ନୂତନ ପଞ୍ଚାୟତ ଭାବେ ଗଠିତ ହୋଇଥିଲେ ମଧ୍ୟ ଆଶାନୁରୁପ ବିକାଶ ହୋଇ ନ ଥିବାବେଳେ ପଞ୍ଚାୟତ ପାଇଁ ସର୍ବନିମ୍ନ ଆବଶ୍ୟକତା ସ୍ଥାୟୀ କାର୍ଯ୍ୟାଳୟଟିଏ ନିର୍ମାଣ କରାଯାଇ ନାହିଁ ।
ଗାଁର ଅବହେଳିତ ନିଷ୍ପେସିତ ଗରିବ ଖଟିଖିଆ ଲୋକଙ୍କ ହକ୍ ପାଇଁ ଏହି ଲଢେଇ ବୋଲି କହିଥିଲେ । ନରେନ୍ଦ୍ର ମୋଦିଙ୍କ ଲୋକାଭିମୁଖି ଯୋଜନାକୁ ଦଳମତ ନିର୍ବିଶେଷରେ ପଞ୍ଚାୟତବାସୀଙ୍କ ନିକଟରେ ପହଁଞ୍ଚାଇବା ସହ ଲୋକଙ୍କୁ ସର୍ବନିମ୍ନ ମୌଳିକ ସୁବିଧା ସୁଯୋଗ ଯୋଗାଇ ଦେବାକୁ ପ୍ରାଥମିକତା ଦିଆଯିବ ବୋଲି କହିଛନ୍ତି ।
ସେହିପରି ଗତ 5 ବର୍ଷ ଧରି ଏହି ପଞ୍ଚାୟତରେ ପିସି ନହେଲେ କାମ ହେଉନାହିଁ । ଦଳୀୟ ଲୋକଙ୍କୁ ସବୁ ଯୋଜନାରେ ଅଗ୍ରାଧିକାର ଦିଆଯାଉଛି । ତେଣୁ ଦଳ, ମତ ନିର୍ବିଶେଷରେ ଏକ ଦୁର୍ନୀତିମୁକ୍ତ ପଞ୍ଚାୟତ ଗଠନ ପାଇଁ ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଇଥିବା କହିଛନ୍ତି ସରପଞ୍ଚ ପ୍ରାର୍ଥିନୀ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
