ଭଦ୍ରକ: ବିଧାୟକଙ୍କ ଗାଡି ଧକ୍କାରେ ଜଣେ ଗୁରୁତର । ଭଦ୍ରକ ଜିଲ୍ଲା 16 ନମ୍ବର ଜାତୀୟ ରାଜପଥରେ ଜଣେ ବ୍ୟକ୍ତିଙ୍କୁ ରେମୁଣା ବିଧାୟକଙ୍କ ଗାଡି ଧକ୍କା ଦେଇଛି । ଫଳରେ ବ୍ୟକ୍ତି ଜଣଙ୍କ ଅବସ୍ଥା ଗୁରୁତର ରହିଛି ।
ସୂଚନାନୁଯାୟୀ, ରେମୁଣା ବିଧାୟକ ସୁଧାଂଶୁ ଶେଖର ପରିଡା ଭୁବନେଶ୍ୱରରୁ ବାଲେଶ୍ୱର ଅଭିମୁଖେ ଆସୁଥିଲେ । 16 ନମ୍ବର ଜାତୀୟ ରାଜପଥ ଭଣ୍ଡାରୀପୋଖରୀ ନିକଟରେ ହଠାତ୍ ତାଙ୍କ ଗାଡିର ଚକା ଫାଟିବାରୁ ଗାଡିଟି ଦୁର୍ଘଟଣାଗ୍ରସ୍ତ ହୋଇଥିବା ସୂଚନା ମିଳିଛି । ବିଧାୟକଙ୍କ ଗାଡି ଦୁର୍ଘଟଣାଗ୍ରସ୍ତ ହୋଇ ସେହି ଅଞ୍ଚଳର ଜନୈକ ଶିକ୍ଷକଙ୍କ ବାଇକକୁ ଧକ୍କା ଦେଇଥିଲା । ଏହା ପରେ ଡିଭାଇଡ଼ର ଉପରେ ଚଢିଯାଇଥିଲା ।
ଆହତ ଶିକ୍ଷକ ଜଣକ ହେଲେ ଭଣ୍ଡାରିପୋଖରୀ ଅଞ୍ଚଳର ସ୍ମୃତି ରଞ୍ଜନ ଦାସ । ଏହି ଦୁର୍ଘଟଣାରେ ଗୁରୁତର ଶିକ୍ଷକଙ୍କୁ ଆମ୍ବୁଲାନ୍ସରେ ଭଣ୍ଡାରିପୋଖରୀ ମେଡିକାଲକୁ ସ୍ଥାନାନ୍ତର କରାଯାଇଥିଲା। ତାଙ୍କ ଅବସ୍ଥା ଗୁରୁତର ହେବାରୁ ପରେ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ତେବେ ଏହି ଦୁର୍ଘଟଣାରେ ରେମୁଣା ବିଧାୟକ ଅଳ୍ପକେ ରକ୍ଷା ପାଇ ଯାଇଛନ୍ତି ଓ ତାଙ୍କର ସ୍ଵାସ୍ଥ୍ୟବସ୍ଥା ଭଲ ଥିବା ସୂଚନା ମିଳିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
