ଭଦ୍ରକ: ସରିଯାଇଛି 2019 ନିର୍ବାଚନୀ ମହାପର୍ବର ତୃତୀୟ ପର୍ଯ୍ୟାୟ ଯୁଦ୍ଧ । ବର୍ତ୍ତମାନ ସବୁ ରାଜନୈତିକ ଦଳ ଚତୁର୍ଥ ପର୍ଯ୍ୟାୟ ପାଇଁ ଆରମ୍ଭ କରିଦେଇଛନ୍ତି ସଜବାଜ । ତେବେ ସବୁ ନିର୍ବାଚନ ମଣ୍ଡଳୀ ଅପେକ୍ଷା ଚର୍ଚ୍ଚାରେ ଭଣ୍ଡାରିପୋଖରୀ ବିଧାନସଭା ନିର୍ବାଚନମଣ୍ଡଳୀ । ଏଠାରେ ରାଜନୈତିକ ପାଣିପାଗ ବେଶ ସରଗରମ ରହିଛି ।
ଚଳିତଥର ଏହି ଆସନରେ ହେଭିୱେଟ ନେତାଙ୍କ ଲଢେଇ ଦେଖିବାକୁ ମିଳିଛି । ତିନି ପ୍ରମୁଖ ରାଜନୈତିକ ଦଳ ପକ୍ଷରୁ ପିସିସି ସଭାପତି ନିରଞ୍ଜନ ପଟ୍ଟନାୟକ, ମନ୍ତ୍ରୀ ପ୍ରଫୁଲ ସାମଲ ଏବଂ ବିଜେପି ଜିଲ୍ଳା ସଭାପତି ବଦ୍ରିନାରାୟଣ ଧଳ ପ୍ରମୁଖ ନିର୍ବାଚନ ଲଢୁଛନ୍ତି ।
ତେଣୁ ଚତୁର୍ଥ ପର୍ଯ୍ୟାୟ ନିର୍ବାଚନ ଭୋଟ ହାତେଇବା ପାଇଁ ଆଜି ପିସିସି ସଭାପତି ଭଣ୍ଡାରିପୋଖରୀରେ ଏକ ରୋଡ ସୋ ମାଧ୍ୟମରେ ତାଙ୍କର ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି । ଏହି କ୍ରମରେ ନିରଞ୍ଜନ ଆଜି ଏକ ଖୋଲା ଗାଡିରେ ବନ୍ତ ବ୍ଲକ ଅନ୍ତର୍ଗତ ତୋଡଗାଁ, କେନ୍ଦୁଆପଦା, ନିଳୋକ, ବସନ୍ତିଆ, ବନ୍ତ, ଟିଲୋ, ଓଡ଼ଙ୍ଗ, ଅଣିଜୋ ହୋଇ ରାମଚନ୍ଦ୍ରପୁର ଆଦି ଅଞ୍ଚଳରେ ପ୍ରଚାର କାର୍ଯ୍ୟକ୍ରମ କରାଯାଇଛି ।
ଏହି ରୋଡ ସୋ କାର୍ଯ୍ୟକ୍ରମରେ ବହୁ ସଂଖ୍ୟାରେ କଂଗ୍ରେସ ନେତା ଏବଂ କର୍ମୀମାନେ ଯୋଗ ଦେଇଥିଲେ । ତେବେ ଏହି ନିର୍ବାଚନ ତାଙ୍କର ଶେଷ ନିର୍ବାଚନ ହୋଇଥିବାରୁ ସେ ତାଙ୍କ ଭିଟାମାଟିରୁ ନିର୍ବାଚନ ଲଢିବା ପାଇଁ ସ୍ଥିର କରିଛନ୍ତି ବୋଲି କହିଛନ୍ତି । ଏଥିସହ ସେ ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀ ଅନ୍ତର୍ଗତ ଭାଇ ଭଉଣୀଙ୍କ ସହ ସବୁ ଦିନ ପାଇଁ ରହିବେ ବୋଲି ପ୍ରତିଶ୍ରୁତି ଦେଇଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
