ଭଦ୍ରକ: ପେଟି ଭିତରେ ନବଜାତ ଶିଶୁର ମୃତଦେହ । କଥାଟା ଆଶ୍ଚର୍ଯ୍ୟ ଲାଗିଲେ ବି ଘଟଣାଟା ସତ। ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ଭଦ୍ରକ ଜିଲ୍ଲାରେ । ଖବର ଅନୁଯାୟୀ, 16 ନମ୍ବର ଜାତୀୟ ରାଜପଥର ଖେମକା ଛକ ପେଟ୍ରୋଲ ପମ୍ପ ନିକଟସ୍ଥ ପଡିଆରୁ ଏହି ପେଟିରୁ ଏକ ନବଜାତକର ମୃତଦେହ ଉଦ୍ଧାର ହୋଇଛି ।
ସୂଚନ ଅନୁଯାୟୀ ଭଦ୍ରକ ଗ୍ରାମାଞ୍ଚଳ ଥାନା ଅର୍ନ୍ତଗତ ଖେମକା ଛକ ପେଟ୍ରୋଲ ପମ୍ପ ନିକଟସ୍ଥ ଏକ ପଡିଆରେ ପ୍ୟାକିଂ ପେଟି ପଡିଥିବା ଦେଖିବାକୁ ପାଇଥିଲେ ସ୍ଥାନୀୟ ଲୋକେ। ପେଟି ଖୋଲି ଦେଖିବା ପରେ ସେଥିରେ ଏକ ନବଜାତ ଶିଶୁପୁତ୍ରର ମୃତଦେହ ଦେଖିବାକୁ ପାଇଲେ । ଏହି ଖବର ପ୍ରସାରିତ ହେବା ପରେ ଘଟଣାସ୍ଥଳରେ ଲୋକ ରୁଣ୍ଡ ହୋଇଯାଇଥିଲେ। ସଙ୍ଗେସଙ୍ଗେ ଏ ବିଷୟରେ ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ।
ଘଟଣାସ୍ଥଳରେ ପୋଲିସ ପହଞ୍ଚି ଶିଶୁର ମୃତଦେହକୁ ଜବତ କରିବା ସହ ଅଧିକ ତନାଘନା ଆରମ୍ଭ କରିଛି। ଶିଶୁଟି କାହାର ଏବଂ କିଏ ଆଣି ଏଠାରେ ପକାଇଛି ତାହା ସନ୍ଦେହ ଘେରରେ। ତେବେ ଏହି ଘଟଣାର ତଦନ୍ତ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
