ଭଦ୍ରକ: ସ୍ଥାନୀୟ ଭଣ୍ଡାରିପୋଖରୀ ବ୍ଲକ ବୈତରଣୀ ନଦୀର କଣ୍ଟି ଘାଇକୁ ବନ୍ଦ କରିବା ପାଇଁ ତେଜିଛି ଜନ ଆନ୍ଦୋଳନ । ବ୍ୟାପକ ଜନ ଆନ୍ଦୋଳନ ଆରମ୍ଭ କରାଯିବ ବୋଲି ନବନିର୍ମାଣ କୃଷକ ସଙ୍ଗଠନ ପକ୍ଷରୁ କଣ୍ଟି ଘାଇଠାରେ ଆୟୋଜିତ ସମାବେଶରେ ଚେତାବନୀ ଦିଆଯାଇଛି । ଆୟୋଜିତ ଏହି ସମାବେଶରେ କଣ୍ଟି ଘାଇ ବନ୍ୟାରେ ତିହିଡି, ଚାନ୍ଦବାଲି, ଧାମନଗର ଓ ଭଣ୍ଡାରିପୋଖରୀ ବ୍ଲକର 70ରୁ ଅଧିକ ପଞ୍ଚାୟତର ହଜାର ହଜାର ହେକ୍ଟର ଚାଷ ସମ୍ପୂର୍ଣ୍ଣ ନଷ୍ଟ ହୋଇଥିବା ଅଭିଯୋଗ କରାଯାଇଛି ।
ସୂଚନା ଅନୁଯାୟୀ ଏହି ସମାବେଶରେ ସରକାର ଏକର ପିଛା 15 ହଜାର ଟଙ୍କା ଓ ଭାଗଚାଷୀଙ୍କ ପାଇଁ 7 ହଜାର 500 ଟଙ୍କା କ୍ଷତି ପୂରଣ ଦେବାକୁ ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଦାବି କରାଯାଇଛି। ସରକାର କଣ୍ଟ ଘାଇ ସମସ୍ୟାର ସମାଧାନରେ କାଳକ୍ଷେପଣ ନୀତି ଛାଡିବାକୁ ବକ୍ତାମାନେ ଆହ୍ବାନ ଦେଇଥିଲେ । କଣ୍ଟି ଘାଇର ଉଚ୍ଚତା 5ମିଟର ବୃଦ୍ଧି କରି ଦୈର୍ଘ୍ୟ ମାତ୍ର 170 ମିଟରରେ ସୀମିତ ରଖିବାକୁ ଦାବି ହୋଇଛି । ଏହି ଦାବି ପୂରଣ ପାଇଁ ଉପସ୍ଥିତ ଚାନ୍ଦବାଲି, ତିହିଡି, ଧାମନଗର ଓ ଭଣ୍ଡାରିପୋଖରୀ ବ୍ଳକର ଶହ ଶହ ଲୋକଙ୍କୁ ଶପଥ ପାଠ କରାଯାଇଥିଲା ।
ସେପଟେ ଆଗାମୀ 22 ତାରିଖରେ ଚଣ୍ଡିଖୋଲଠାରେ 20 ହଜାର କୃଷକ ଉପଯୁକ୍ତ ବନ୍ୟା କ୍ଷତି ପୂରଣ ପାଇଁ ରାଜପଥ ଅବରୋଧ କରିବେ ବୋଲି ନବନିର୍ମାଣ କୃଷକ ସଙ୍ଗଠନ ପକ୍ଷରୁ ସୂଚନା ଦିଆଯାଇଥିଲା ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
