ଭଦ୍ରକ: ଜିଲ୍ଲା ଗ୍ରାମାଞ୍ଚଳ ଥାନା ପୋଲିସକୁ ସଫଳତା । ଏକ ବାଇକ ଚୋରି ରାକେଟକୁ ଧରିବାରେ ସଫଳ ହୋଇଛି ପୋଲିସ । 4 ଜଣ ଆନ୍ତ ଜିଲ୍ଲା ବାଇକ ଚୋର ଏବଂ ଜଣେ ରିସିଭରକୁ ମିଶାଇ ମୋଟ 5 ଅଭିଯୁକ୍ତ ଗିରଫ କରିବା ସହ 16 ଟି ବାଇକକୁ ଜବତ କରାଯାଇଛି ।
ସୂଚନା ଅନୁଯାୟୀ ଭଦ୍ରକ ଗ୍ରାମାଞ୍ଚଳ ଥାନା ପଠାନ ମହଲା ଅଞ୍ଚଳରେ ଜଣେ ବ୍ୟକ୍ତିଙ୍କର ବାଇକଟି ଚୋରି ହୋଇଥିଲା । ଏନେଇ ସେ ଭଦ୍ରକ ଗ୍ରାମାଞ୍ଚଳ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଥିଲା । ଶେଷରେ ବାଇକ ଚୋରି ରାକେଟର ମାଷ୍ଟର ମାଇଣ୍ଡ ତିହିଡି ଥାନା ତାଳପଦାର ଚନ୍ଦନ ବେହେରାକୁ ପୋଲିସ କାବୁ କରିବାରେ ସଫଳ ହୋଇଥିଲା ।
ପରେ ତାକୁ ଅଟକ ରଖି ପଚରାଉଚରା କରିବା ସହ ଚୋରା ବାଇକ ଗ୍ୟାଙ୍ଗ ସମ୍ପର୍କରେ ସୁରାକ ପାଇଥିଲା । ପରେ ପୋଲିସ ଟିମ ବାଲେଶ୍ବର ଯାଇ ଏହି ରାକେଟରେ ସମ୍ପୃକ୍ତ ବାଲେଶ୍ବର ଜିଲ୍ଲା ରୁପ୍ସା ଥାନା ଅଞ୍ଚଳର ସୁବ୍ରତ ଗିରି ଓ କାଶୀନାଥ ରାଉଳ, ସାବରଙ୍ଗ ଥାନା ଅଞ୍ଚଳର ବାବାଜୀ ମଲ୍ଲିକଙ୍କୁ ଗିରଫ କରିଥିଲା । ପରେ ଚୋରା ବାଇକ ରଖିବା ଅଭିଯୋଗରେ ତିହିଡି ଥାନା ଗାଜିପୁର ଗାଁର ବିଶ୍ଵ ରଞ୍ଜନ ମହାନ୍ତିଙ୍କ ସହ ମୋଟ 5 ଜଣଙ୍କୁ ଗିରଫ କରାଯାଇଥିଲା ।
ଏହାସହ ସେମାନଙ୍କ ନିକଟରୁ 16ଟି ଚୋରି ଗାଡିକୁ ଜବତ କରାଯାଇଥିଲା । ଏହି ଅଭିଯୁକ୍ତ ମାନଙ୍କ ନାଁରେ ଭଦ୍ରକ ଓ ବାଲେଶ୍ବର ଜିଲ୍ଲାର ବହୁ ଚୋରି ଡକାୟତି ଆଦି ଅନେକ ଅପରାଧିକ ମାମଲା ରହିଥିବା ଜଣାପଡ଼ିଛି । ଏହି ଘଟଣାରେ ଅହୁରି ଅନେକ ପେସାଦାର ଅପରାଧୀ ସାମିଲ ଥିବା ଜଣାପଡ଼ିଛି । ତେଣୁ ଏନେଇ ଅଧିକ ତଦନ୍ତ ଜାରି ରଖିଛି ପୋଲିସ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
