ଭଦ୍ରକ: ଭୟାବହ ଅଗ୍ନିକାଣ୍ଡରେ ଜଳିଗଲା 4 ପରିବାରର 10 ବଖରା ଘର । ଲକ୍ଷାଧିକ ଟଙ୍କାର ସମ୍ପତ୍ତି ଜଳି ପୋଡି ପାଉଁଶ ହୋଇଯାଇଛି । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି ।
ସର୍ଟ ସର୍କିଟ ଯୋଗୁଁ ଅଗ୍ନିକାଣ୍ଡ! ଜଳିଗଲା 4 ପରିବାରର 10 ବଖରା ଘର
ସୂଚନା ଅନୁଯାୟୀ ଭଦ୍ରକ ଜିଲ୍ଲା ସାହାଡ଼ା ପଞ୍ଚାୟତର ସମିଆଁ ଗାଁ ଅନ୍ତର୍ଗତ ଖର୍ଦ୍ଧା ସାହିର ଉପେନ୍ଦ୍ର ବେହେରା, ସନାତନ ବେହେରା, ଅମୁଲ୍ୟ ବେହେରା ଓ ଅଭୟ ବେହେରାଙ୍କର 10 ବଖରା ଘର ସମ୍ପୂର୍ଣ୍ଣ ଜଳି ପୋଡି ପାଉଁଶ ହୋଇଯାଇଛି । ବୁଧବାର ବିଳମ୍ବିତ ରାତିରେ ସର୍ଟ ସର୍କିଟ ଯୋଗୁଁ ଏହିପରି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । ସମସ୍ତେ ଶୋଇଥିବା ବେଳେ ହଠାତ ନିଆଁ ଲାଗିଥିଲା । ଘରର ସମସ୍ତ ସଦସ୍ୟ ନିଜ ଜୀବନକୁ ବଞ୍ଚାଇବା ପାଇଁ ଦୌଡ଼ି ବାହାରକୁ ପଳାଇ ଆସିଥିବା ବେଳେ ଘରେ ଥିବା ଆସବାବପତ୍ର କାଢି ପାରି ନଥିଲେ । ଫଳରେ ଘରର ଆସବାବ ପତ୍ର ପୋଡି ପାଉଁଶ ହୋଇଯାଇଛି । ଖବର ପାଇ ଘଟଣା ସ୍ଥଳରେ ଭଦ୍ରକ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି ।
ଭଦ୍ରକରୁ ଦେବାଶିଷ ମହାପାତ୍ର,ଇଟିଭି ଭାରତ
