ଭଦ୍ରକ: ସରଳତାର ସୁଯୋଗ ନେଇ ମୃତ୍ୟୁ ପରେ ବି ଛାଡିଲେ ନାହିଁ । ପରିବାର ଲୋକଙ୍କ ବିନା ଅନୁମତିରେ ମୃତ ବ୍ୟକ୍ତିଙ୍କ ତାଡିନେଲେ ଆଖି । ଏତିକିରେ ସରିଲା ନାହିଁ ନିର୍ଯାତନା । ମୃତଦେହ ବ୍ୟବଚ୍ଛେଦ ପାଇଁ ଲାଞ୍ଚ ନେଲେ ଏହାସହ ଶବ ବାହକ ଗାଡି ବାବଦକୁ ଲୁଟିଲେ 4 ହଜାର 5ଶହ ଟଙ୍କା । ଏମିତି ଏକ ଭୟଙ୍କର ଛାତିଥରା ଘଟଣା ଏବେ ସାରା ରାଜ୍ୟକୁ ଦୋହଲାଇ ଦେଇଛି । ଘଟଣା ଘଟିଛି ରାଜ୍ୟର ସର୍ବମାନ୍ୟ କଟକ ବଡ ମେଡିକାଲରେ ।
ପରିବାରର ବିନା ଅନୁମତିରେ କଟକ ବଡ ମେଡିକାଲରେ ଏପରି ଘଟଣା ଘଟିବା ପରେ ଏବେ ସବୁଠି ହଇଚଇ । ଅଭିଯୋଗ ହେବା ପରେ ମାମଲା ରୁଜୁ କରିଛି ଭଦ୍ରକ ଟାଉନ ଥାନା ପୋଲିସ ।
ସୂଚନା ଅନୁସାରେ, ଗତ 7 ତାରିଖରେ ଭଦ୍ରକ ଜିଲ୍ଲା ବାଗୁରାଇ ଆଦିବାସୀ କଲୋନୀର ବୀର ଗାଗାରା କୌଣସି କାରଣରୁ ବିଷ ପିଇ ଦେଇଥିଲେ । ପରିବାର ଲୋକେ ତାଙ୍କୁ ଭଦ୍ରକ ପରେ କଟକ ବଡ ମେଡିକାଲକୁ ସ୍ଥାନାନ୍ତର କରିଥିଲେ । ହେଲେ 11 ତାରିଖରେ ବୀରଙ୍କ ଚିକିତ୍ସାଧିନ ଅବସ୍ଥାରେ ମୃତ୍ୟୁ ହୋଇଥିଲା । ଶବ ବ୍ୟବଛେଦ ପରେ ପରିବାର ଲୋକେ ମୃତଦେହ ନେଇ ଘରକୁ ଯାଇ ଅନ୍ତିମ ସଂସ୍କାର କରିବା ପାଇଁ ପ୍ରସ୍ତୁତି ଆରମ୍ଭ ବେଳେ ମୃତକଙ୍କ ଆଖି ନଥିବା ଦେଖିଥିଲେ । ପରେ ସନ୍ଦେହ ହେବାରୁ କଟକ ବଡ ମେଡିକାଲ ଦେଇଥିବା କାଗଜ ପତ୍ରରୁ ଜାଣିବାକୁ ପାଇଥିଲେ ଯେ ତାଙ୍କ ଅଜାଣତରେ ବୀରଙ୍କ ଆଖି ତାଡି ନେଇଛନ୍ତି । ଏହାକୁ ନେଇ କିଛି ସ୍ବେଚ୍ଛାସେବୀଙ୍କ ସହାୟତାରେ ପ୍ରଥମେ ଜିଲ୍ଲାପାଳ ପରେ ଭଦ୍ରକ ଏସପିଙ୍କୁ ସାକ୍ଷାତ କରି ନ୍ୟାୟ ଦେବାକୁ ଦାବି କରିଛନ୍ତି ଶୋକାକୁଳ ପରିବାର ।
ଏଠି ପ୍ରଶ୍ନ ଉଠୁଛି ମୃତଦେହକୁ ସମ୍ମାନ ଦେଇ ରାଜ୍ୟ ସରକାର ମହାପ୍ରୟାଣ ଯୋଜନା କରିଛନ୍ତି । ହେଲେ କେଉଁ ପରିସ୍ଥିତିରେ ଏଠି ଜଣେ ସରଳ ନୀରିହ ପରିବାରକୁ ଗାଡି ନଦେଇ ଘରୋଇ ଆମ୍ବୁଲାନ୍ସରେ ଯିବା ପାଇଁ ଦେଲେ । ଯଦ୍ବାରା ସେମାନେ ଆର୍ଥିକ ଶୋଷଣର ଶୀକାର ହୋଇଛନ୍ତି । ଏଥିପାଇଁ ଦାୟୀ କିଏ? ମୃତକ ବୀର ଓ ତାଙ୍କ ପରିବାରର ବିନା ସହମତିରେ କେମିତି ଆଖି ତାଡିଦେଲେ ? ରାଜ୍ୟରେ ବେଆଇନ ଭାବେ ଅଙ୍ଗ ପ୍ରତ୍ୟେଙ୍ଗ ନେବା ଏକ ରାକେଟ କାମ କରୁଛି କି? ଏହି ନୀରିହ ପରିବାରକୁ ରାଜ୍ୟ ସରକାର ନ୍ୟାୟ ଦେଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ କି ନାହିଁ ଏବେ ତା ଉପରେ ନଜର ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
