ଭଦ୍ରକ: ଦାଦାବଟି ଆଦାୟକୁ କେନ୍ଦ୍ର କରି ଚାନ୍ଦବାଲି ବ୍ଲକ ଅନ୍ତର୍ଗତ ଘଣ୍ଟେଶ୍ଵର ବଜାରରେ ମରଣାନ୍ତକ ଆକ୍ରମଣ । ଘଟଣାରେ ଜଣେ ଗାଡି ଚାଳକ ଗୁରୁତର ହୋଇଛନ୍ତି । ଗୁରୁତରଙ୍କୁ ତୁରନ୍ତ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇ ଚିକିତ୍ସା କରାଯାଉଛି । ଏନେଇ ସ୍ଥାନୀୟ ଘଣ୍ଟେଶ୍ବର ଫାଣ୍ଡିରେ ଅଭିଯୋଗ ହେବା ପରେ ଅଭିଯୁକ୍ତ ଫେରାର ରହିଥିବା ଜଣା ପଡିଛି ।
ଅଭିଯୋଗ ମୁତାବକ ଘଣ୍ଟେଶ୍ଵର ବଜାରରେ ଅଧିକାଂଶ ଦିନ ସିଲୁଆ ଦାସ ଓ କିଛି ସହଯୋଗୀ ଗାଡି ଚାଳକମାନଙ୍କଠାରୁ ଜୋର ଜବରଦସ୍ତ ଦାଦାବଟି ଆଦାୟ କରିଥାନ୍ତି । ଏହି କ୍ରମରେ ରବିବାର ପ୍ରଫୁଲ୍ଲ ଦାସ ନାମକ ଜଣେ ଗାଡି ଚାଳକଙ୍କ ଗାଡିକୁ ଅଭିଯୁକ୍ତ ସିଲୁଆ ଅଟକାଇବା ସହ ଦାଦାବଟି ମାଗିଥିଲେ । ହେଲେ ସେ ଦିନକୁ ଦୁଇଥର ଟଙ୍କା ଦେଇପାରିବେ ନାହିଁ ବୋଲି କହିଥିଲେ ।
ଏଥିରେ ଉତ୍କ୍ଷିପ୍ତ ହୋଇ ସିଲୁଆ ଦାସ ପ୍ରଫୁଲ୍ଲଙ୍କୁ ମାଡ ମାରିବା ସହ ଏକ ଧାରୁଆ ବ୍ଲେଡରେ ଆକ୍ରମଣ କରିଥିଲା । ଫଳରେ ଡ୍ରାଇଭର ଜଣଙ୍କ ଗୁରୁତର ଭାବେ ଆହତ ହୋଇଥିଲେ । ଆହତ ଅବସ୍ଥାରେ ସ୍ଥାନୀୟ ଲୋକେ ତାଙ୍କୁ ତୁରନ୍ତ ଘଣ୍ଟେଶ୍ଵର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ପରେ ତାଙ୍କୁ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତରିତ କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
