ଭଦ୍ରକ: ଦୀର୍ଘ ସମୟର ଉଦ୍ୟମ ପରେ ଧରାପଡିଲା ପୋଖରୀରୁ ୩ ଫୁଟିଆ କୁମ୍ଭୀର । ଦିନ ତମାମ ବନ ବିଭାଗ ସମେତ ଅଗ୍ନିଶମ ବିଭାଗ ନାକେଦମ ହେବାକୁ ପଡିଥିଲା । ଭଦ୍ରକ ଜିଲ୍ଲା ତିହିଡି ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଥିଲା । ଶେଷରେ ପୋଖରୀରୁ ପାଣି ନିଷ୍କାସନ ପରେ ଧରା ପଡିଛି କୁମ୍ଭୀର । ବନ ବିଭାଗ ପକ୍ଷରୁ କୁମ୍ଭୀରକୁ ଚାନ୍ଦବାଲି ନିଆଯାଇଥିବା ଜଣାଯାଇଛି ।
ସୂଚନା ମୁତାବକ, କିଛିଦିନ ହେଲା ତିହିଡି ବ୍ଲକ ମହରମପୁର ପଞ୍ଚାୟତ ଷାଠିବାଟି ଗାଁର ଏକ ପୋଖରୀରେ ଗୋଟିଏ କୁମ୍ଭୀର ଥିବା ନେଇ ଲୋକେ ଭୟଭୀତ ଅବସ୍ଥାରେ ରହୁଥିଲେ । ତେବେ ବୁଧବାର ଦିନ ବନ ବିଭାଗର କର୍ମଚାରୀମାନେ କୁମ୍ଭୀରକୁ ଉଦ୍ଧାର ପାଇଁ ଦମକଳ ବାହିନୀକୁ ଖବର ଦେଇଥିଲେ । ବନବିଭାଗ ଓ ଦମକଳ ବାହିନୀର ମିଳିତ ସହଯୋଗରେ ଆରମ୍ଭ ହୋଇଥିଲା ଅପରେସନ । 4ଟି ପାଣି ପମ୍ପରେ ପୋଖରୀରୁ ପାଣି ନିଷ୍କାସନ କରାଯାଇଥିଲା । ତହସିଲଦାରଙ୍କ ସମେତ ସ୍ଥାନୀୟ ସରପଞ୍ଚ ଏହାର ତଦାରଖ କରୁଥିବା ବେଳେ କୁମ୍ଭୀର ଦେଖିବା ପାଇଁ ଶହ ଶହ ଲୋକଙ୍କ ଭିଡ ଜମିଥିଲା । ତେବେ ଏନେଇ ବନ ବିଭାଗ କି ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ।
ଭଦ୍ରକୁ ଦେବାଶିଷ ମହାପାତ୍ର, ଇଟିଭି ଭାରତ
