ଭଦ୍ରକ: ଏପ୍ରିଲ 29 ତାରିଖ ଓଡିଶାରେ ଶେଷ ତଥା ଚତୁର୍ଥ ପର୍ଯ୍ୟାୟରେ ହେବାକୁ ଥିବା ମତଦାନ ପୂର୍ବରୁ ଭଦ୍ରକ ଜିଲ୍ଲାରେ ରାଜନୈତିକ ପାଣିପାଗ ବେଶ ସରଗରମ ହୋଇଛି । ତେବେ ଚଳିତଥର ନିର୍ବାଚନରେ ଭଦ୍ରକ ଜିଲ୍ଲା ଅନ୍ତର୍ଗତ 5 ଟି ବିଧାନସଭା ଆସନ ସହ ଭଦ୍ରକ ଲୋକସଭା ଆସନରେ ବିଜେଡି ବାଜିମାତ କରିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ଭଦ୍ରକ ବିଜେଡି ଜିଲ୍ଲା ସଭାପତି ଜଗନ୍ନାଥ ସ୍ୱାଇଁ ।
ବିକାଶକୁ ମୁଖ୍ୟ ମୁଦ୍ଦା କରିଥିବା ବିଜେଡିର ନିର୍ବାଚନୀ ପ୍ରଚାର କରିବା ପାଇଁ ଚଳିତ ମାସ 23 ତାରିଖରେ ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭଦ୍ରକ ଜିଲ୍ଲା ଗସ୍ତରେ ଆସୁଛନ୍ତି । ଏନେଇ ସୂଚନା ଦେଇଛନ୍ତି ଜିଲ୍ଲା ବିଜେଡି ସଭାପତି ଜଗନ୍ନାଥ ସ୍ୱାଇଁ । ଏହି ଗସ୍ତ ସମୟରେ ନବୀନ ପଟ୍ଟନାୟକ ପ୍ରଥମେ ବାସୁଦେବପୁର ନିର୍ବାଚନ ମଣ୍ଡଳୀ ଏବଂ ଭଦ୍ରକ ନିର୍ବାଚନ ମଣ୍ଡଳୀ ଗସ୍ତ କରିବେ । ପରେ ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀର ବନ୍ତଠାରେ ନିର୍ବାଚନୀ ପ୍ରଚାର କରିବା ସହ ଶେଷରେ ଧାମନଗର ବିଧାନସଭା ନିର୍ବାଚନ ମଣ୍ଡଳୀ ଗସ୍ତ କରିବାର କାର୍ଯ୍ୟକ୍ରମ ରହିଛି ବୋଲି କହିଛନ୍ତି ଭଦ୍ରକ ଜିଲ୍ଲା ସଭାପତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
