ଭଦ୍ରକ : ଭଦ୍ରକ ଗ୍ରାମାଞ୍ଚଳ ଥାନା ପୋଲିସକୁ ବଡ ସଫଳତା । ଅନ୍ତରାଜ୍ୟ କୁଖ୍ୟାତ ବ୍ରାଉନ ସୁଗାର ମାଫିଆ ସହ ଧଳା ଜହର କାରବାର କରୁଥିବା 4 ଅଭିଯୁକ୍ତ ଗିରଫ । 265 ଗ୍ରାମ ବ୍ରାଉନ ସୁଗାର ଜବତ । ଏହି ଜବତ ହୋଇଥିବା ବ୍ରାଉନ ସୁଗାର ଆନୁମାନିକ ବଜାର ମୂଲ୍ୟ 26 ଲକ୍ଷ ଟଙ୍କାରୁ ଊର୍ଦ୍ଧ୍ବ ହେବ ବୋଲି ସୂଚନା ମିଳିଛି ।
ଖବର ଅନୁଯାୟୀ, ଏକ ବିଶ୍ୱସ୍ତ ସୂତ୍ରରୁ ଖବର ପାଇ ଭଦ୍ରକ ଗ୍ରାମାଞ୍ଚଳ ଥାନାର ଭାରପ୍ରାପ୍ତ ଅଧିକାରୀ ଆଲୋକ ଜେନାଙ୍କ ନେତୃତ୍ବରେ ଗଠିତ ଏକ ସ୍ଵତନ୍ତ୍ର ଟିମ, ଭଦ୍ରକ ଜିଲ୍ଲା ଦେଇ ଯାଇଥିବା 16 ନମ୍ବର ଜାତୀୟ ରାଜପଥର ଚରମ୍ପା ଧାମରା ଓଭରବ୍ରିଜ ନିକଟରେ ତଲାସୀ କରିଥିଲେ ।
ଏହି ସମୟରେ ସେଠାରେ ସନ୍ଧିଗ୍ଧ ଅବସ୍ଥାରେ ଏକ ନମ୍ବର ବିହୀନ ମଟର ସାଇକେଲ ସହ ଦୁଇ ଜଣଙ୍କୁ ତଲାସୀ କରିବା ପରେ ସେମାନଙ୍କ ନିକଟରୁ 265 ଗ୍ରାମ ଓଜନର ବ୍ରାଉନ ସୁଗାର ଜବତ କରିଥିଲା ପୋଲିସ । ପରେ ସେମାନଙ୍କୁ ଜେରା କରିବା ପରେ, ନିଦ୍ଧିଷ୍ଟ ତଥ୍ୟ ପ୍ରମାଣ ଆଧାରରେ ଏହି ଧଳା ଜହର କାରବାର ରେ ଚରମ୍ପା ବୋଉଳ ପୋଖରୀ ଅଞ୍ଚଳରେ ଥିବା ଅନ୍ୟ ଦୁଇ ଜଣ ମହିଳାଙ୍କୁ ମଧ୍ୟ ଗିରଫ କରିଛି ପୋଲିସ ।
ତେବେ ଏହି ଘଟଣାରେ ଗିରଫ ହୋଇଥିବା ମୋଟ 4 ଜଣଙ୍କ ମଧ୍ୟରୁ ଜଣେ ଅନ୍ତରାଜ୍ୟ କୁଖ୍ୟାତ ବ୍ରାଉନ ସୁଗାର ମାଫିଆ ଥିବା ସୂଚନା ଦେଇଛନ୍ତି ଭଦ୍ରକ ଜିଲ୍ଲା ଅତିରିକ୍ତ ଆରକ୍ଷୀ ଅଧୀକ୍ଷକ । ତେବେ ଏହି ବ୍ରାଉନ ସୁଗାର କେଉଁ ସ୍ଥାନରୁ ଆସିଥିଲା, ଏହି କାରବାରରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି, ସେ ନେଇ ଚିତ୍ର ସ୍ପଷ୍ଟ ହୋଇନଥିବା ବେଳେ ଏନେଇ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
