ଭଦ୍ରକ: ଆରଡ଼ି ରାସ୍ତାର ହରିପୁର ଛକ ନିକଟରେ ଏକ ବଡ଼ ଧରଣର ଡକାୟତି ଉଦ୍ୟମକୁ ପଣ୍ଡ କରିଛି ଭଦ୍ରକ ପୋଲିସ । ଏହାସହ 3ଜଣ ଅପରାଧୀଙ୍କୁ କାବୁ କରିବାକୁ ସକ୍ଷମ ହୋଇଛି ପୋଲିସ । ଏହି ଡକାୟତ ଯୋଜନା କରିଥିବା ମାଷ୍ଟରମାଇଣ୍ଡ କୁଖ୍ୟାତ ଗ୍ୟାଙ୍ଗଷ୍ଟର ବାଦଲ ରାଉତ ସହ 4ଜଣ ଘଟଣା ସ୍ଥଳରୁ ଫେରାର ହେବାରେ ସକ୍ଷମ ହୋଇଛନ୍ତି । ଏକ ବଡ଼ ଧରଣର ଡକାୟତି କରିବା ପାଇଁ ଭଦ୍ରକ ଗ୍ରାମାଞ୍ଚଳ ଥାନା ଅନ୍ତର୍ଗତ ଆରଡି ରାସ୍ତାର ହରିପୁର ଛକ ନିକଟରେ 7 ଜଣ ଅପରାଧୀ ଯୋଜନା କରୁଥିଲେ।
ଏନେଇ ଏକ ବିଶ୍ୱସ୍ତ ସୂତ୍ରରୁ ଖବର ପାଇ ଭଦ୍ରକ ଗ୍ରାମାଞ୍ଚଳ ଥାନାର ଏକ ସ୍ଵତନ୍ତ୍ର ଟିମ୍ ସେଠାରେ ଚଢ଼ାଉ କରିଥିଲେ। ଏହି ସମୟରେ ମାଷ୍ଟରମାଇଣ୍ଡ କୁଖ୍ୟାତ ଗ୍ୟାଙ୍ଗଷ୍ଟର ବାଦଲ ସମେତ 4 ଜଣ ସେଠାରୁ ଫେରାର ହେବାରେ ସକ୍ଷମ ହୋଇଛନ୍ତି। ହେଲେ ଅନ୍ୟ 3 ଜଣଙ୍କୁ ପୋଲିସ ଟିମ୍ କାବୁ କରିବାରେ ସଫଳ ହୋଇଛି । ଗିରଫ ଅଭିଯୁକ୍ତ 3 ଜଣ ଅପରାଧି ହେଉଛନ୍ତି ଭୁବନେଶ୍ଵର ଅଞ୍ଚଳର ସାଗର ସେଠୀ, କୋରକୋରା ଅଞ୍ଚଳର ସମରେନ୍ଦ୍ର ମଲ୍ଲିକ ଓ କୁଆଁସ ଅଞ୍ଚଳର ଶିବ ମଲ୍ଲିକ ।
ଅଭିଯୁକ୍ତଙ୍କ ନିକଟରୁ ଏକ ଭୁଜାଲି ଓ ଦୁଇଟି ଲୁହା ରଡ ଜବତ କରିଛି ପୋଲିସ । ମୋଷ୍ଟ ୱାଣ୍ଟେଡ଼ କୁଖ୍ୟାତ ଗ୍ୟାଙ୍ଗଷ୍ଟର ବାଦଲ ନାମରେ ଜିଲ୍ଲା ତଥା ଜିଲ୍ଲା ବାହାରେ ଅନେକ ଅପରାଧିକ ମାମଲା ରହିଛି । ବାଦଲକୁ ଧରିବା ପାଇଁ ପୂର୍ବରୁ ମଧ୍ୟ ପୋଲିସ ଅନେକ ଯୋଜନା କରି ସାରିଛି । ତେବେ କାବୁ କରିଥିବା 3 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏହି ଘଟଣାକୁ ନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
