ଭଦ୍ରକ: ଜିଲ୍ଲା ଚାନ୍ଦବାଲି ବ୍ଲକ ବାଂଶଡା ଥାନା ଅଧିନ ନଳଗୋହିରା ପଞ୍ଚାୟତ କରଣ ପୋଖରୀ ଗ୍ରାମରେ ବଧୂ ହତ୍ଯା ଅଭିଯୋଗ ହୋଇଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଅଭିଯୋଗ ଆଧାରରେ ଶାଶୁ, ଦିଅର ଓ ଯାଆଙ୍କୁ ଅଟକ ରଖାଯାଇଛି ।
ମତୋ ପଞ୍ଚାୟତ ବଣିଆ ସାହିର ଲମ୍ବଧର ସାମଲଙ୍କ ଝିଅ ରଞ୍ଜୁଲତା ନାୟକ ୪ ବର୍ଷ ତଳେ ନଳଗୋହିରା ପଞ୍ଚାୟତ କରଣ ପୋଖରୀ ଗ୍ରାମର ବଂଶୀଧର ନାୟକଙ୍କ ପୁଅ ବିଜୟ ନାୟକଙ୍କୁ ବୈଦିକ ରିତୀନିତୀରେ ବିବାହ କରିଥିଲେ । ବିବାହ ପରେ ରଞ୍ଜୁଲତାଙ୍କୁ ତାଙ୍କ ଶାଶୁ, ଯାଆ ଓ ଦିଅର ସବୁ ସମୟରେ ମାନସିକ ନିର୍ଯାତନା ଦେଉଥିଲେ ବୋଲି ଜଣାପଡିଛି ।
କିନ୍ତୁ କିଛି ଦିନ ପୂର୍ବରୁ ଶାଶୁ ଘର ଲୋକେ ରଞ୍ଜୁଲତାଙ୍କୁ ବାହାର କରିଦେଇଥିଲେ । ଭଦ୍ରଲୋକଙ୍କ ଆପୋଷ ସମାଧାନ ପରେ ଘରେ ରହିବାକୁ ତାଙ୍କୁ ଅନୁମତି ମିଳିଥିଲା । ପରେ ଶାଶୁ ଘରର ପରିବାର ଲୋକେ ଏକତ୍ରିତ ହୋଇ ରଞ୍ଜୁଲତାଙ୍କୁ ହତ୍ୟା କରିଛନ୍ତି ବୋଲି ମୃତକର ବାପା ବାଂଶଡା ଥାନାରେ ଅଭିଯୋଗ କରିଥିଲେ । ପରେ ବାଂଶଡା ପୋଲିସ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଆରମ୍ଭ କରିବା ସହ ଅଭିଯୋଗ ଆଧାରରେ ମୃତ ରଞ୍ଜୁଲତାଙ୍କ ଶାଶୁ, ଦିଅର ଓ ଯାଆକୁ ଥାନାରେ ଅଟକ ରଖିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
