ଭଦ୍ରକ: ଭଦ୍ରକ ଜିଲ୍ଲାପାଳ ଅଫିସ ଭଙ୍ଗାରୁଜା ଘଟଣାରେ 8 ଗିରଫ । ଗତ ଗୁରବାର ମଧ୍ୟାହ୍ନରେ ଓବିସିଙ୍କ ପାଇଁ ସଂରକ୍ଷଣ କରିବା, ଭୋଟର ତାଲିକାରେ ଜାଲିଆତି ଓ ପଞ୍ଚାୟତ ନିର୍ବାଚନ ପାଇଁ ଜାରି ହୋଇଥିବା ସରଂକ୍ଷଣ ତାଲିକାରେ ବେଆଇନ କରାଯାଇଥିବା ଦର୍ଶାଇ ଭଦ୍ରକ ବିଜେପି ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରାଯାଇଥିଲା । ଏହି ଉପଲକ୍ଷେ ବିରୋଧୀ ଦଳ ଉପନେତା ବିଧାୟକ ବିଷ୍ଣୁ ସେଠୀଙ୍କ ନେତୃତ୍ବରେ ସ୍ଥାନୀୟ ଗାନ୍ଧୀ ପଡ଼ିଆଠାରୁ ବିଜେପି କର୍ମୀମାନେ ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରିବା ପରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ଓ ପ୍ରତିବାଦ କରିଥିଲେ ।
ଠିକ ଏହି ସମୟରେ ବିଜେପି କର୍ମୀମାନେ ଜିଲ୍ଲାପାଳଙ୍କ ମୁଖ୍ୟ ଫାଟକରେ ପୋଲିସ ସହ ଧସ୍ତାଧସ୍ତି କରିବା ପରେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଜବରଦସ୍ତ ଧସେଇ ପଶିଥିଲେ । ପରେ ସେଠାରେ ବ୍ୟାପକ ଭଙ୍ଗାରୁଜା କରିଥିଲେ । ଏପରିକି ଜିଲ୍ଲାପାଳଙ୍କ ଗାଡ଼ିକୁ ଭାଙ୍ଗିବା ସହିତ ଅଭିଯୋଗ ବାକ୍ସ ଓ ଚେୟାର ଭଙ୍ଗାରୁଜା କରିଥିଲେ । ପରେ ଭିଡିଓ ଫୁଟେଜ ଆଧାରରେ ପୋଲିସ ତଦନ୍ତ କରି ପ୍ରଥମ ପର୍ଯ୍ୟାୟରେ ଏହି 8 ଜଣଙ୍କୁ ଗିରଫ କରିଥିବା ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
