ଭଦ୍ରକ: ଏମଭି ଚେକିଂ ସମୟରେ ଖୋଲିଲା ଗଞ୍ଜେଇ ଚୋରା ଚାଲାଣ କରୁଥିବା ରାକେଟର ଗୁମର । ଏହି ଘଟଣାରେ ଗିରଫ ହୋଇଛନ୍ତି 8 ଜଣ ଅଭିଯୁକ୍ତ । ଏହାସହିତ 45 କିଲୋ ଗଞ୍ଜେଇ, ମାରଣାସ୍ତ୍ର, ମୋବାଇଲ, କାର ସହ ଗୋଟିଏ ଆମ୍ବୁଲାନ୍ସ ଜବତ ହୋଇଛି ।
ଖବର ଅନୁଯାୟୀ ଭଦ୍ରକ ଜିଲ୍ଲା ଦେଇ ଯାଇଥିବା 16 ନମ୍ବର ଜାତୀୟ ରାଜପଥର, ଭଦ୍ରକ ସହର ଉପକଣ୍ଠରେ ଥିବା ଆପ୍ରଚ ରୋଡରେ ଟାଉନ ଥାନା ପୁଲିସ ପକ୍ଷରୁ ଏମଭି ଚେକିଂ ଚାଲିଥିଲା । ଏହି ସମୟରେ ସନ୍ଧିଗ୍ଧ ଭାବେ ଆସୁଥିବା ଏକ କାର ସହ ଏକ ଆମ୍ବୁଲାନ୍ସକୁ ଯାଞ୍ଚ କରିବା ବେଳେ ଉଭୟ ଗାଡିରୁ ମୋଟ 45 କିଲୋ ଗଞ୍ଜେଇ ଜବତ କରାଯାଇଛି । ଯାହାକି ଫୁଲବାଣୀରୁ ଭଦ୍ରକ ପୁରୁଣା ବଜାର ଅଞ୍ଚଳକୁ ଚାଲାଣ ହେଉଥିବା ନେଇ ସ୍ପଷ୍ଟ କରିଛନ୍ତି ଜିଲ୍ଲା ଅତିରିକ୍ତ ଆରକ୍ଷୀ ଅଧୀକ୍ଷକ ଯତୀନ୍ଦ୍ର ପଣ୍ଡା ।
ତେବେ ଏନେଇ ଅଧିକ ତଦନ୍ତ ଜାରି ରହିଥିବା ବେଳେ ଦିନକୁ ଦିନ ଭଦ୍ରକ ଜିଲ୍ଲାର ବିଭିନ୍ନ ସ୍ଥାନରେ ନିଶା ମାଫିଆ ମାନେ ସେମାନଙ୍କ କାୟା ବିସ୍ତାର କରିବାରେ ଲାଗିଛନ୍ତି । ଏହାକୁ ପ୍ରତିହତ କରିବା ପାଇଁ ଜିଲ୍ଲା ପୋଲିସ ପକ୍ଷରୁ ଆରମ୍ଭ ହୋଇଛି ତତ୍ପରତା ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
