ବରଗଡ଼: ଅତାବିରା ଥାନା ଅନ୍ତର୍ଗତ ବ୍ଲକ ଛକ ନିକଟ ସମ୍ବଲପୁର ସମବାୟ ବ୍ୟାଙ୍କ କମ୍ପ୍ଲେକ୍ସରେ ଥିବା ସୁନା ଗହଣା ଦୋକାନ ସତ୍ୟନାରାୟଣ ଜୁଏଲାରୀରୁ ଲକ୍ଷାଧିକ ମୂଲ୍ୟର ସୁନା ଗହଣା ଚୋରି । ଅପରାହ୍ନ 2ଟା ସମୟରେ ଦୋକାନୀ ତାଙ୍କ ଦୋକାନ ବନ୍ଦ କରି ଖାଇବାକୁ ଯାଇଥିଲେ ଏବଂ ପୁଣି 3 ଟା 30 ମିନିଟରେ ଦୋକାନ ଖୋଲିଥିଲେ। ତେବେ ଏହି ବନ୍ଦ ଥିବା ସମୟରେ ଦୁର୍ବୃତ୍ତମାନେ ଦୋକାନ ପଛପଟ କାନ୍ଥ ଭାଙ୍ଗି ଦୋକାନ ଭିତରୁ ପାଖାପାଖି 70 ଲକ୍ଷ ଟଙ୍କା ମୂଲ୍ୟର ସୁନାଗହଣା ଚୋରି କରି ନେଇଯାଇଥିବା ଅଭିଯୋଗ ହୋଇଛି ।
ଏହି ଦୋକାନ ମାଲିକଙ୍କ ଦୋକାନରେ ପୂର୍ବରୁ ମଧ୍ୟ ଚୋରି ଏବଂ ଡକାୟତି କରାଯାଇଥିବାବେଳେ ପୁଣି ଥରେ ବଡ ଧରଣର ଚୋରି ହୋଇଛି । ଘଟଣାସ୍ଥଳକୁ ଅତାବିରା ପୋଲିସ ଓ ଜିଲ୍ଲା ଆରକ୍ଷୀ ଅଧ୍ୟକ୍ଷା ପଦ୍ମିନୀ ସାହୁ ପହଞ୍ଚି ତନାଘନା ଆରମ୍ଭ କରିଛନ୍ତି । ଏନେଇ ପୋଲିସ ଏକ ଚୋରି ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଛି। ତେବେ ଅତାବିରା ଅଞ୍ଚଳରେ ଏହା ପ୍ରଥମ ଥର 70 ଲକ୍ଷ ଟଙ୍କାର ବଡ ଧରଣର ଚୋରି ହୋଇଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
