ବରଗଡ: ଜିଲ୍ଲା ପୋଲିସକୁ ବଡ ସଫଳତା । ବହୁ ଚର୍ଚ୍ଚିତ ପାଇକମାଳ ବ୍ଲକ ଯୋଗେନ୍ଦ୍ରନାଥପୁରର ୮ ବର୍ଷର ଝଅ ହତ୍ୟାକାଣ୍ଡର ପର୍ଦ୍ଦାଫାଶ କରିଛି ବରଗଡ ପୋଲିସ । ଘଟଣାରେ ମୁଖ୍ୟ ଅଭିଯୁକ୍ତକୁ ଗିରଫ କରିଛି ପୋଲିସ ।
୮ ବର୍ଷର କୁନିଝିଅକୁ ଅନ୍ୟ କେହି ନୁହେଁଁ ବରଂ ତାର ନିଜ ଖୁଡୀ ହିଁ ହତ୍ୟା କରିଥିବା ବରଗଡ ଏସପି ପଦ୍ମିନୀ ସାହୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଝିଅଟିକୁ ସମସ୍ତେ ସ୍ନେହ କରୁଛନ୍ତି ଭାବି ଈର୍ଷାପରାୟଣ ହୋଇ ଝିଆରୀକୁ ନିଜ ଖୁଡୀ ଜଙ୍ଗଲକୁ ଡାକି ନେଇ ପ୍ରଥମେ ବାଲଟିରେ ପଟିବା ସହ ପଥରରେ ଛେଚି ହତ୍ୟା କରିଥିବା ପୋଲିସ ପକ୍ଷରୁ ସୂଚନା ମିଳିଛି ।
ପ୍ରକାଶ ଥାଉ କି, ମୃତ ନାବାଳିକାର ବାପା ରାଜେନ୍ଦ୍ର ପାଣ୍ଡେ ଓ ଭାଇ ଶ୍ୟାମ ରଣା ଉଭୟ ପରିବାର ଏକାଠି ରହୁଛନ୍ତି । ଘରର ସମସ୍ତେ ରାଜେନ୍ଦ୍ରଙ୍କ ଝିଅକୁ ଅଧିକ ସ୍ନେହ କରୁଥିଲେ ଏବଂ ଶ୍ୟାମଙ୍କ ପୁଅକୁ ସ୍ନେହ କରୁ ନଥିବାରୁ ଈର୍ଷା ପରାୟଣ ହୋଇ ଶ୍ୟାମଙ୍କ ସ୍ତ୍ରୀ ନିଜ ଝିଆରୀକୁ ଗତ 3 ତାରିଖରେ ହତ୍ୟା କରିଥିବା ସ୍ଵୀକାର କରିଛି । ଗତ ୫ ତାରିଖ ଯୋଗେନ୍ଦ୍ରନାଥପୁର ଜଙ୍ଗଲରୁ କୁନି ଝିଅର ମୃତଦେହ ଉଦ୍ଧାର ହୋଇଥିଲା । ଏହା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ଘଟଣାରେ ସୋମବାର ମୁଖ୍ୟ ଅଭିଯୁକ୍ତ ଝିଅର ଖୁୁଡୀକୁ ଗିରଫ କରି କୋର୍ଟ ଚାଲାଣ କରିଛି ।
ବରଗଡରୁ ରାଜେଶ ସରାଫ, ଇଟିଭି ଭାରତ
