ଭୁବନେଶ୍ବର: ଜୋର ଧରୁଛି ପଶ୍ଚିମ ଓଡିଶାରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ଦାବି । ଏନେଇ ରାଜ୍ୟ ସରକାରଙ୍କୁ ପୂର୍ଣ୍ଣାଙ୍ଗ ରିପୋର୍ଟ ମାଗିଲା ରାଜ୍ୟ ବିଜେପି । ସେପଟେ, ଆଜି ସାରା ପଶ୍ଚିମ ଓଡିଶାରେ ହାଇକୋର୍ଟ ବେଞ୍ଚ ସ୍ଥାପନାକୁ ନେଇ 12 ଘଣ୍ଟିଆ ବନ୍ଦ ପାଳନ ହୋଇଥିବାବେଳେ, ରାଜ୍ୟପାଳଙ୍କୁ ଅବଗତ କରାଇବାକୁ ବିଜେପି ପକ୍ଷରୁ ଅନୁଷ୍ଠିତ ହୋଇଥିଲା ସାମ୍ବାଦିକ ସମ୍ମିଳନୀ। ଯଦି ପ୍ରକୃତରେ ସରକାର ପଶ୍ଚିମ ଓଡିଶାରେ ସ୍ଥାୟୀ ବେଞ୍ଚ ପ୍ରତିଷ୍ଠା ପାଇଁ ଆଗ୍ରହୀ ତେବେ କେନ୍ଦ୍ରକୁ ରିପୋର୍ଟ ଦେବାକୁ କହିଛନ୍ତି ବରଗଡ ସାଂସଦ ସୁରେଶ ପୂଜାରୀ ।
ସେ ଆହୁରି ମଧ୍ୟ କହିଛନ୍ତି ଯେ ଏହି ଦାବି ଦୀର୍ଘ 50 ବର୍ଷର ହୋଇଥିବାବେଳେ, ଏହାକୁ ନେଇ ଅନେକ ଆନ୍ଦୋଳନ ଚାଲିଛି । ସେଠାକାର ଲୋକଙ୍କୁ ଉନ୍ନତ ଆଇନ ସେବା ପ୍ରଦାନ ଦିଗରେ ଏହାର ଆବଶ୍ୟକତାକୁ ଦୃଷ୍ଟିରେ ରଖି କେନ୍ଦ୍ର ଆଇନ ମନ୍ତ୍ରଣାଳୟ ପକ୍ଷରୁ ଓଡ଼ିଶା ହାଇକୋର୍ଟକୁ ଚିଠି ଲେଖାଯାଇଛି । ହେଲେ ହାଇକୋର୍ଟ କୌଣସି ରାଜନୈତିକ ଚାପ ହେଉ କିମ୍ବା ଅନ୍ୟ କୌଣସି ପାଇଁ ଏହାର ପର୍ଯ୍ୟନ୍ତ ଉତ୍ତର ପ୍ରଦାନ କରିନାହାଁନ୍ତି । ସେହିପରି ରାଜ୍ୟ ସରକାରଙ୍କ ପକ୍ଷରୁ ଦିଆଯାଇଥିବା ରିପୋର୍ଟରେ ସବିଶେଷ ତଥ୍ୟ ଯେମିତିକି କେଉଁଠି, କେଉଁ କେଉଁ ଅଞ୍ଚଳକୁ ନେଇ ଏବଂ ଏହାଦ୍ବାରା କେତେ ପରିମାଣର ଲୋକ ଉପକୃତ ହେବେ ସେନେଇ ମଧ୍ୟ ଉଲ୍ଲେଖ ନାହିଁ । ଓଡିଶା ସରକାର ତୁରନ୍ତ ସ୍ଥାନ ନିର୍ଦ୍ଧାରଣ କରି ପୂର୍ଣ୍ଣାଙ୍ଗ ତଥ୍ୟ ସହ କେନ୍ଦ୍ର ସରକାରଙ୍କୁ ପ୍ରଦାନ କରନ୍ତୁ ।
ପଶ୍ଚିମ ଓଡିଶାବାସୀଙ୍କ ଧୈର୍ଯ୍ୟକୁ ସମ୍ମାନ ଦେଇ ଉଭୟ ରାଜ୍ୟ ସରକାର ଓ ହାଇକୋର୍ଟ ତୁରନ୍ତ ଚୂଡାନ୍ତ ରିପୋର୍ଟ ପଠାନ୍ତୁ। ଯାହାକୁ ରାଜ୍ୟର ବିଜେପି ସାଂସଦ କେନ୍ଦ୍ର ସରକାରଙ୍କ ନିକଟରେ ଏହାକୁ କାର୍ଯ୍ୟକାରୀ କରିବାକୁ ରାଜ୍ୟ ସରକାରଙ୍କ ସହିତ ମିଳିତ ଭାବେ କେନ୍ଦ୍ର ଉପରେ ଚାପ ପକାଇବେ ବୋଲି ସୁରେଶ ପୂଜାରୀ କହିଛନ୍ତି । ଆଜିର ଏହି ସାମ୍ବାଦିକ ସମ୍ମିଳନୀରେ ବିଜେପି ପଶ୍ଚିମ ଓଡିଶାର ସଭାପତି, ରାଜ୍ୟ ମୁଖପାତ୍ର ଓ ଅନ୍ୟମାନେ ଉପସ୍ଥିତ ଥିଲେ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
