ବରଗଡ: ସ୍ଥାନୀୟ ରେଙ୍ଗାଲୀ କ୍ୟାମ୍ପଠାରୁ ପାପଙ୍ଗା ପର୍ଯ୍ୟନ୍ତ ଯିବାକୁ ହେଲେ ସାହା ହେଉଛି କେନାଲ ପାଖ ଦେଇ ଯାଇଥିବା ଏକମାତ୍ର ପିଚୁ ରାସ୍ତା । 10 ବର୍ଷ ତଳେ ପ୍ରଧାନମନ୍ତ୍ରୀ ସଡକ ଯୋଜନାରେ ଏହି ରାସ୍ତା ନିର୍ମାଣ ହୋଇଥିବା ବେଳେ ସମୟ ସହ ଧିରେ ଧିରେ କୋନାଲ ପାଣିରେ ଧୋଇ ହେବାରେ ଲାଗିଛି ଏହି ରାସ୍ତା । ସେଥିରେ ପୁଣି ଟ୍ରକ ଓ ବସ ପରି ଭାରୀଯାନର ଗମନାଗମନ ଯୋଗୁଁ ରାସ୍ତା ଆହୁରି ଦବି ଯାଉଥିବା ଦେଖାଯାଉଛି । ଯାହାର ନିର୍ମାଣ ପାଇଁ ଦୀର୍ଘ ଦିନ ହେବ ତେଜିଛି ସ୍ଥାନୀୟବାସୀଙ୍କ ଦାବି ।
ସୂଚନା ମୁତାବକ ଏହି ରାସ୍ତାରେ ଯାତାୟତ ଦିନକୁ ଦିନ ବିପଦସଙ୍କୁଳ ହେବାରେ ଲାଗିଥିବାରୁ ସ୍ଥାନୀୟ ଲୋକେ ଏନେଇ ପ୍ରଶାସନକୁ ବାରମ୍ବାର ଅବଗତ କରାଇଛନ୍ତି । ତଥାପି ପ୍ରଶାସନ ନିଜ ନିରବତା ଜାରି ରଖିବାରୁ ଜୀବନକୁ ପାଣି ଛଡାଇ ଏହି ରାସ୍ତା ଦେଇ ଯିବା ଆସିବା କରୁଛନ୍ତି ସ୍ଥାନୀୟ ଅଞ୍ଚଳବାସୀ । ଆଖପାଖ ଅଞ୍ଚଳରେ ଯିବା ଆସିବା ପାଇଁ ଏହି ଗୋଟିଏ ରାସ୍ତା ଥିବାରୁ ଏହି ରାସ୍ତା ଦେଇ ଦୈନିକ ହଜାର ହଜାର ଲୋକେ ଯିବା ଆସିବା କରନ୍ତି । ହେଲେ ଦିନକୁ ଦିନ ରାସ୍ତାର ଅବସ୍ଥା ଖରାପ ହେବାରେ ଲାଗିଥିବାରୁ ଏହି ରାସ୍ତା ଦେଇ ଯିବା ଆସିବା ପାଇଁ ଲୋକେ ଭୟଭୀତ ହେଉଛନ୍ତି ।
ଗୋଟିଏ କିମ୍ବା ଦୁଇଟି ନୁହେଁ ବରଂ ବହୁ ସ୍ଥାନରେ ରାସ୍ତାର ଅବସ୍ଥା ଏହିପରି ରହିଛି । ଧାନ ବୋଝେଇ ଟ୍ରକ ଏହି ରାସ୍ତା ଦେଇ ଯିବା ଆସିବା କରିବାରୁ ରାସ୍ତା ଦବିବା ସହ ଦୁର୍ଘଟଣାର ମାତ୍ରା ମଧ୍ୟ ବଢିବାରେ ଲାଗିଛି । ତେବେ ସାଧାରଣ ଲୋକଙ୍କ ଦାବି ମୁତାବକ ନିର୍ମାଣ ହେବା ଦିନଠାରୁ ଏହି ରାସ୍ତାର ମରାମତି କାର୍ଯ୍ୟ ହୋଇ ନାହିଁ । ତେଣୁ ରାସ୍ତା ତଳୁ ମାଟି ଖାଇ ରାସ୍ତା ଭୁଷୁଡିବା ପୂର୍ବରୁ ବିଭାଗୀୟ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଧ୍ୟାନ ଦେବା ପାଇଁ ଦାବି ତେଜିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
