ବରଗଡ଼: ଜିଲ୍ଲା ପଦ୍ମପୁର ଉପଖଣ୍ଡ ଘେଁସ ନିକଟରେ ଥିବା ବଡ଼ଜୋର ବ୍ରିଜ ଉପରେ ଦୁର୍ଘଟଣା । ଦୁଇ ବାଇକ ମୁହାଁମୁହିଁ ଧକ୍କାରେ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ 3 ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ ବରଗଡ଼ ଟାଉନ ଥାନା ଅନ୍ତର୍ଗତ ବରାହଗୁଡା ଗ୍ରାମର ତୁଳସିକର ମାଝୀ ଏବଂ ତାଙ୍କ ଭାଇ ବାଇକରେ ପଦ୍ମପୁର ଯାଉଥିବା ବେଳେ ଅପରପଟୁ ଅନ୍ୟ ଏକ ବାଇକରେ ଛତିଶଗଡ଼ ଅଞ୍ଚଳର ଦୁଇଜଣ ବାଇକ ଆରୋହୀଙ୍କ ସହିତ ମୁହାଁମୁହିଁ ଧକ୍କା ହୋଇଥିଲା । ଫଳରେ ରାସ୍ତାରେ ଯାଉଥିବା ଲୋକେ ନିକଟସ୍ଥ ମେଳଛାମୁଣ୍ଡା ଥାନାକୁ ଯୋଗାଯୋଗ କରି ଗୁରୁତରଙ୍କୁ ସୋହେଲା ହସ୍ପିଟାଲକୁ ପହଞ୍ଚାଇଥିଲେ । ମାତ୍ର ଡାକ୍ତର ସେଠାରେ ଜଣଙ୍କୁ ମୃତ ଘୋଷଣା କରିଥଲେ ।
ମୃତକ ଜଣକ ଛତିଶଗଡ଼ ମହାସମୁନ୍ଦ ଜିଲ୍ଲା କୁଦୋଗୁଡ଼ା ଗ୍ରାମର କବି ଶଙ୍କର ଭୋଇ ବୋଲି ଜଣାପଡ଼ିଛି । ତେବେ ତାଙ୍କ ସଙ୍ଗେ ବାଇକରେ ଥିବା ଅନ୍ୟ ଜଣଙ୍କର ଅବସ୍ଥା ମଧ୍ୟ ସଙ୍କଟାପନ୍ନ ରହିଥିବା ବେଳେ ବରାହଗୁଡାର ଦୁଇ ବାଇକ ଆରୋହୀ ଆହତ ହୋଇ ବୁର୍ଲାରେ ଚିକିତ୍ସିତ ହେଉଥିବା ସୂଚନା ମିଳିଛି ।
ବର୍ତ୍ତମାନ ସୁଦ୍ଧା ଦୁର୍ଘଟଣାର କାରଣ ଜଣାପଡି ନାହିଁ । କିନ୍ତୁ ଭୋରରୁ କୁହୁଡ଼ି କାରଣରୁ ଆଗକୁ ରାସ୍ତା ଦେଖାନଯିବାରୁ ଏହି ଦୁର୍ଘଟଣା ହୋଇଥିବା ଅନୁମାନ କରାଯାଉଛି । ପୋଲିସ ଉଭୟ ବାଇକକୁ ଜବତ କରିବା ସହିତ ମୃତ ବ୍ୟକ୍ତିଙ୍କୁ ବ୍ୟବଚ୍ଛେଦ ପାଇଁ ବରଗଡ଼ ଡାକ୍ତରଖାନାକୁ ପଠାଇଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
