ବରଗଡ: ତିନି ମାସ ପରେ ଖୋଲିଲା ମୃତ୍ୟୁ ପଛର ଗୁମର । ବିଷ ପିଆଇ ହତ୍ୟା କରାଯାଇଥିବା ଘଟଣାରେ ମୁହଁ ଖୋଲିଛନ୍ତି ପରିବାର ଲୋକେ । ଆଉ ମାଟିତଳୁ ଉଦ୍ଧାର ହୋଇଛି କଙ୍କାଳ। ଏଭଳି ଘଟଣା ଘଟିଛି ବରଗଡ ଜିଲ୍ଲାରେ ।
ଗତ ଦୁଇବର୍ଷ ତଳେ ଆମ୍ବାମୁଣ୍ଡା ଗାଁର ଉଦେ ତାଣ୍ଡି ନିଜ ଜମିରେ କୋବି ଚାଷ କରିଥିଲେ। କେତେ ଜଣ ବ୍ୟକ୍ତି ଇର୍ଷାନିତ୍ୱ ହୋଇ ରାତିରେ ଉଦେ ତାଣ୍ଡିଙ୍କର କୋବି ଚାଷକୁ ସମ୍ପୂର୍ଣ ଭାବେ ଓପାଡି ନଷ୍ଟ କରିଦେଇଥିଲେ | ଏହି ଘଟଣାକୁ ନେଇ ଗାଁରେ ଏକ ବୈଠକ ବସିଥିଲା ଏବଂ ୮ ଜଣ ଦୋଷୀଙ୍କୁ ଚିହ୍ନଟ କରାଯାଇ ମେଳଛାମୁଣ୍ଡା ଥାନାରେ କେସ ରୁଜୁ କରାଯାଇଥିଲା | ପୋଲିସ ସମସ୍ତ ଦୋଷୀଙ୍କୁ ଗିରଫକରି କୋର୍ଟଚାଲାଣ କରାଯାଇଥିଲା |
ତେବେ କିଛି ଦିନ ପରେ ଅଭିଯୁକ୍ତ ଜେଲରୁ ମୁକୁଳି ପ୍ରତିଶୋଧ ପରାୟଣ ହୋଇ ଉଦେ ତାଣ୍ଡିଙ୍କୁ ଜୋର ଜବରଦସ୍ତ ବିଷ ପିଆଇ ଦେଇଥିଲେ | ଉଦେ ତାଣ୍ଡି ଅସୁସ୍ଥ ଅବସ୍ଥାରେ ଘରକୁ ଫେରିବା ପରେ ତାଙ୍କ ସ୍ତ୍ରୀ ଇଳା ତାଣ୍ଡିଙ୍କୁ ସମସ୍ତ କଥା ଜଣାଇଥିଲେ ଓ ସୁରେଶ୍ଵର ଠେଲା ତାଙ୍କୁ ବିଷ ପିଆଇଦେଇଥିବା କହିଥିଲେ | ଉଦେଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ସ୍ଥାନୀୟ ଡାକ୍ତରଖାନା ନିଆଯାଇଥିଲା କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିଲା |
ସ୍ତ୍ରୀ ଇଳା ଏହି ଘଟଣା ବିଷୟରେ ବାହାରେ ପ୍ରଘଟ କରିବାରୁ ଅଭିଯୁକ୍ତ ଆସି ମୃତ ଉଦେଙ୍କ ପରିବାରକୁ ଧମକ ଚମକ ଦେଇଥିଲେ । ଫଳରେ ପରିବାର ଲୋକେ ଡରିଯାଇ ଥାନାରେ କେସ କରିନଥିଲେ | କିନ୍ତୁ ପୁଣି ତିନି ମାସ ପରେ ସାହସ ଯୁଟାଇ ମୃତକ ଉଦେ ତାଣ୍ଡିଙ୍କ ପୁଅ ଜିତ ଅଭିଯୁକ୍ତ ଙ୍କ ବିରୁଦ୍ଧରେ ମୁଣ୍ଡା ଥାନାରେ ଅଭିଯୋଗ କରିଥିଲେ | ଅଭିଯୋଗକୁ ଭିତ୍ତି କରି ପୋତା ଯାଇଥିବା ସ୍ଥାନକୁ ମାଜିଷ୍ଟ୍ରେଟଙ୍କ ସମ୍ମୁଖରେ ଖୋଳି ଉଦେ ତାଣ୍ଡିଙ୍କ କଙ୍କାଳ ବାହାର କରାଯାଇଥିଲା । ଡିଏନଏ ଟେଷ୍ଟ ପାଇଁ ପଠାଇ ତଦନ୍ତ ଆରମ୍ଭ କରିଛି ପୋଲିସ ।
ବରଗଡରୁ ରାଜେଶ ସରାପ, ଇଟିଭି ଭାରତ
