ବରଗଡ: ପୋଲିସ ଉପରେ ଜନତାଙ୍କ ଆକ୍ରୋଶ । ଭିଡ ଭିତରେ ପୋଲିସ ହେଉଛି ଅପଦସ୍ତ । ଅଭଦ୍ର ଭାଷାରେ ଗାଳିଗୁଲଜ କରୁଛନ୍ତି ଲୋକେ । ଆଇନର ରକ୍ଷକଙ୍କୁ ଘେରିଯାଇ ଆତ୍ମହତ୍ୟା କରିବାକୁ କହୁଛନ୍ତି । ଯାହାର ଭିଡିଓ ସୋସିଆଲ ମାଡିଆରେ ଭାଇରାଲ ହେବାରେ ଲାଗିଛି ।
ଲୋକଙ୍କୁ ସୁରକ୍ଷା ଦେଉଥିବା ପୋଲିସକୁ ଲୋକଙ୍କଠୁ ସୁରକ୍ଷା ଦେବାକୁ ପଡୁଥିବା ଏ ଭାଇରାଲ ଭିଡିଓରେ ଦେଖିବାକୁ ମିଳୁଛି । ଜଣେ ପୋଲିସ ଅଧିକାରୀଙ୍କୁ ଲୋକମାନେ ଘେରିଥିବାରୁ ଅନ୍ୟ ପୋଲିସମାନେ ତାଙ୍କୁ ଲୋକଙ୍କଠୁ ମୁକୁଳାଇବାକୁ ଚେଷ୍ଟା କରୁଥିବା ଏହି ଦୃଶ୍ୟ ବୟାନ କରୁଛି ।
ଏହି ଭିଡିଓଟି ମେ ମାସର ଓ ବରଗଡ ଜିଲ୍ଲା ବିଜେପୁର ଥାନା ଲାଉମୁଣ୍ଡା ଗ୍ରାମର ବୋଲି ଜଣାପଡିଛି । ଲୋକମାନେ ଘେରିଥିବା ପୋଲିସ ଜଣଙ୍କ ବିଜେପୁର ଥାନା ଅଧିକାରୀ ରାଜେନ୍ଦ୍ର ସିଆଲ ହୋଇଥିବାବେଳେ ଲୋକଙ୍କୁ ବୁଝାସୁଝା କରୁଥିବା ପୋଲିସ ଜଣଙ୍କ ପଦ୍ମପୁର ଏସଡିପିଓ ପ୍ରଦୀପ କୁମାର ସାହୁ ।
ତେବେ ପ୍ରଶ୍ନଉଠୁଛି ପୋଲିସ ଅଧିକାରୀ ଜଣଙ୍କୁ ଏପରି କଣ ପାଇଁ କରୁଛନ୍ତି ଜନତା । ଆଉ ଜନତାଙ୍କ ଏପରି ବ୍ୟବହାର ପରେ ବି କଣ ପାଇଁ ପୋଲିସ କିଛି କାର୍ଯ୍ୟାନୁଷ୍ଠାନ ନେଇନାହିଁ । ତେବେ ଘଟଣାର ଅନୁସନ୍ଧାନ କରିବାରୁ ଘଟଣା ସାମ୍ନାକୁ ଆସିଛି ଯେ, ଲାଉମୁଣ୍ଡାର ସୁପାଲ ଭୋଇଙ୍କୁ ପ୍ରଥମେ ଚିଙ୍କୁ ଶତପଥୀ ନାମକ ଜଣେ ବ୍ୟକ୍ତି ମାଡମାରିବା ସହ ହତ୍ୟା ଧମକ ଦେଇଥିବା ବିଜେପୁର ଥାନାରେ ଅଭିଯୋଗ ହୋଇଥିଲା । ଏହା ପରେ ଅପ୍ରେଲ 29 ତାରିଖରେ ସୁପାଲ ନିଖୋଜ ଥିବାବେଳେ ଦୀର୍ଘ 35 ଦିନ ପରେ ସୁପାଳଙ୍କ ପରିତ୍ୟକ୍ତ ମୃତଦେହ ଏକ ଗଛରେ ଝୁଲନ୍ତା ଅବସ୍ଥାରେ ମିଳିଥିଲା । ପରେ ଖବର ପାଇ ପୋଲିସ ସେଠାରେ ପହଞ୍ଚିଥିଲା । ତେବେ ପୋଲିସ ପ୍ରଥମେ ଦିଆଯାଇଥିବା ଅଭିଯୋଗକୁ ଗୁରୁତର ସହ ନେଇନଥିବାରୁ ଏପରି ହୋଇଥିବା ଲୋକମାନେ ଅଭିଯୋଗ କରିବା ସହ ପୋଲିସକୁ ଘେରିଯାଇଥିଲେ ।
ବରଗଡରୁ ରାଜେଶ ସରାପ୍, ଇଟିଭି ଭାରତ
