ଭୁବନେଶ୍ବର: ପଦ୍ମପୁର ବ୍ୟାଟେଲ (Padampur by Poll) ପାଇଁ ପ୍ରସ୍ତୁତ ମୈଦାନ । ଲଢେଇରେ ବାଜି ମାରିବା ପାଇଁ ପ୍ରସ୍ତୁତ ହେଉଛି ରଣନୀତି । ପ୍ରାର୍ଥୀ ଚୟନକୁ ନେଇ ପୁରା ସିରିୟସ 3 ଦଳ । ଆଜି ବିଜେପି ଓ କଂଗ୍ରେସ ବିଧିବଦ୍ଧ ଭାବେ ନିଜ ଯୋଦ୍ଧା ଘୋଷଣା କରିଛନ୍ତି । ବିଜେପି ପୂର୍ବତନ ବିଧାୟକ ପ୍ରଦୀପ ପୁରୋହିତଙ୍କୁ ପ୍ରାର୍ଥୀ କରିଛି । ପଦ୍ମପୁରରେ ଚାଷ ଚାଷୀ ପ୍ରସଙ୍ଗକୁ ନେଇ ନିର୍ବାଚନ ବୈତରଣୀ ପାର ହେବାକୁ ଲକ୍ଷ୍ୟ ରଖିଛି ଗେରୁଆ ଦଳ ।
ପ୍ରଧାନମନ୍ତ୍ରୀଙ୍କ ଦକ୍ଷ ନେତୃତ୍ବ ସହ ବିଜେପି ପ୍ରଧାନମନ୍ତ୍ରୀ ଫସଲ ବୀମା ଯୋଜନା, କୃଷି ସିଂଚାଇ ଯୋଜନା, ପିଏମ କିଷାନ ଭଳି କେନ୍ଦ୍ରୀୟ ଯୋଜନାକୁ ନେଇ ଭୋଟ ମାଗିବାକୁ ଯୋଜନା କରିଛି । ଏହାସହ କେନ୍ଦ୍ର ସରକାର କିଭଳି ଚାଷୀଙ୍କ ଉନ୍ନତି ପାଇଁ ଉତ୍ସର୍ଗୀକୃତ ଭାବେ କାମ କରୁଛନ୍ତି ତାହାକୁ ନେଇ ଭୋଟ ମାଗିବ ଦଳ । ଏତତ ବ୍ୟତୀତ କେନ୍ଦ୍ରରେ ମୋଦି ସରକାର କୋଭିଡ କାଳରେ କିପରି ଚାଷୀଙ୍କ ପାଇଁ ସହାୟକ ହୋଇପାରିଛି ସେକଥା କହି ଭୋଟ ମାଗିବ ବିଜେପି । ମୋଦି ସରକାରଙ୍କ ଲୋକାଭିମୁଖୀ ଯୋଜନା ଚାଷୀଙ୍କୁ ଜୀବନ ଓ ଜୀବିକାକୁ କିପରି ବଞ୍ଚାଇ ରଖିପାରିଛି ତାହା ମଧ୍ୟ ଲୋକଙ୍କ ବୁଝାଇବ ଦଳ ।
ଏହାବି ପଢନ୍ତୁ- Padmapur By Poll: ବିଜେପିକୁ ପାର କରାଇବେ ପଶ୍ଚିମାଞ୍ଚଳ ନେତା !
ସେପଟେ ପଦ୍ମପୁର ଉପ ନିର୍ବାଚନ ଜିତି ଦଳକୁ ଶକ୍ତି ଦେବା ପାଇଁ କମର କଷୁଛି କଂଗ୍ରେସ । ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି, ଦଳରେ କୌଣସି ସମସ୍ୟା ନାହିଁ । ନବୀନ ଓ ମୋଦଙ୍କ ସପକ୍ଷରେ ହାୱା ନାହିଁ । ସତ୍ୟଭୂଷଣ ସାହୁ ଦଳୀୟ ପ୍ରାର୍ଥୀ ହୋଇଛନ୍ତି । ବିଜେପି ଚାଷୀଙ୍କୁ ବିରୋଧ କରୁଛି । ବିଜେଡି ଚାଷୀଙ୍କୁ ଭୁବନେଶ୍ୱର ପୁରେଇ ଦେଉନାହିଁ । ଏବେ କେମିତି ଚାଷୀଙ୍କୁ ଭୋଟ ମାଗିବ ବୋଲି ତାରା ପ୍ରଶ୍ନ କରିଛନ୍ତି । ଚାଷୀ ନିଷ୍ପତ୍ତି ନେଇସାରିଲେଣି କଂଗ୍ରେସକୁ ଭୋଟ ଦେବେ । 2 ରୁ 3 ଦିନ ଭିତରେ କଂଗ୍ରେସ ପ୍ରାର୍ଥୀ ନାମାଙ୍କନ ଦାଖଲ କରିବେ ବୋଲି କହିଛନ୍ତି ତାରା ପ୍ରସାଦ ବାହିନୀପତି ।
ଅନ୍ୟପଟେ କଟକ ମେୟର ସୁବାସ ସିଂ କହିଛନ୍ତି, ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି ପଦ୍ମପୁର ବିଜେଡିର । ସେଠି ଦଳ ସୁଦୃଢ ଅଛି । ଅନୁକମ୍ପା ବି ରହିଛି । ଗତ ପଞ୍ଚାୟତ ନିର୍ବାଚନରେ ବିଜେଡି ବଡ ବ୍ୟବଧାନରେ ବିଜୟୀ ହୋଇଥିଲା । ଏହାସହ ମୁଖ୍ୟମନ୍ତ୍ରୀ ବରଗଡ ଜିଲ୍ଲାରେ ବିକାଶ କାର୍ଯ୍ୟ ତ୍ୱରାନ୍ୱିତ କରିଛନ୍ତି । ତେଣୁ ଆମ ପ୍ରାର୍ଥୀ ଜିତିବାରେ କୌଣସି ଅସୁବିଧା ନାହିଁ । ଯେହେତୁ ଏହି ସିଟ୍ଟି ବିଜୁ ଜନତା ଦଳର, ତେଣୁ ଆଶା ଆଶଙ୍କା ପ୍ରକାଶ କରିବା ଠିକ ନୁହେଁ । ବିଭିନ୍ନ ରାଜନୈତିକ ଦଳ ଭିନ୍ନ ଭିନ୍ନ ଷ୍ଟ୍ରାଟେଜି କରନ୍ତି ।
ମୁଖ୍ୟମନ୍ତ୍ରୀ ବରଗଡ ଜିଲ୍ଲାର ବିକାଶ କାର୍ଯ୍ୟ ତ୍ୱରାନ୍ୱିତ କରିଛନ୍ତି । ସେଥିରେ ପଦ୍ମପୁର ଅନ୍ୟତମ । ଲୋକଙ୍କ ବିଶ୍ୱାସରେ ବିଜୁ ଜନତା ଦଳ ଓ ମୁଖ୍ୟମନ୍ତ୍ରୀ ଅଛନ୍ତି । ସମସ୍ତ କର୍ମୀ ଓ ନେତା ଉତ୍ସଗୀକୃତ ଭାବରେ ସେବା କରିଛନ୍ତି । ପଶ୍ଚିମ ଓଡିଶାର ପ୍ରମୁଖ ନେତା ଦାୟିତ୍ୱରେ ଅଛନ୍ତି । ପ୍ରାର୍ଥୀ ନେଇ ମୁଖ୍ୟମନ୍ତ୍ରୀ ନିଷ୍ପତ୍ତି ନେବେ ବୋଲି କହିଛନ୍ତି ସୁବାସ ସିଂ ।
ଏହାବି ପଢନ୍ତୁ- Padmapur ByPoll: ଉପନିର୍ବାଚନ ପୂର୍ବରୁ ବିଜେଡିରେ ମିଶିଲେ ଶତାଧିକ ବିରୋଧି କର୍ମୀ
ତେବେ ଧାମନଗରରେ ବିଜେଡି ପରାସ୍ତ ହେବା ପରେ, ପଦ୍ମପୁରରେ କୌଣସି ରିସ୍କ ନେବାକୁ ଚାହୁଁନି । ଦଳ ପୁରା ରଣନୀତି ସହ ଲଢିବାକୁ ଯାଉଛି । ବିଜେପି ବି ବିଜୟ ଧାରା ବଜାୟ ରଖିବାକୁ ଅଣ୍ଟା ଭିଡିଛି । ଆଉ ଉଭୟଙ୍କ ଲଢେଇରେ ବାଜି ମାରିବାକୁ କଂଗ୍ରେସ ଆଶା ରଖିଛି । ଏବେ ଅପେକ୍ଷା ପଦ୍ମପୁରବାସୀଙ୍କ ରାୟକୁ ।
ଇଟିଭି ଭାରତ, ଭୁବନେଶ୍ବର
