ବରଗଡ: ବଲାଙ୍ଗୀର ସମ୍ବଲପୁର ରେଳପଥରରେ ସମ୍ବଲପୁରରୁ ବରଗଡ଼ ପଟକୁ ଆସୁଥିବା ଏକ କୋଇଲା ବୋଝେଇ ଟ୍ରେନର ଗୋଟିଏ ବଗିରେ ନିଆ ଲାଗିଯାଇଥିଲା । ଏଥିପାଇଁ ବରଗଡ଼ ଜିଲ୍ଲା ଗୋଡ଼ଭଗା ଷ୍ଟେସନରେ ଏହି ମାଲବାହୀ ଟ୍ରେନଟି ଅଟକି ରହିଥିଲା । ଖବର ପାଇ ଅଗ୍ନିଶମ ବିଭାଗ ଗୋଡଭଗା ଷ୍ଟେସନରେ ପହଞ୍ଚି ନିଆଁକୁ ଆୟତ୍ତ କରିଥିଲା ।
ସମ୍ବଲପୁର ଡିଭିଜନରୁ ବିଜୟଓ୍ବାଡା ଯାଉଥିବା ଏହି ଟ୍ରେନରେ ନିଆଁ ଲାଗିଥିବା ଖବର ପାଇ ଗୋଡ଼ଭାଗା ଷ୍ଟେସନ ମାଷ୍ଟର ଆଶିଷ ବିଶ୍ବାଳ ଏହାକୁ ଅଟକାଇ ବୁର୍ଲା ଅଗ୍ନିଶମ ବିଭାଗକୁ ଖବର ଦେଇଥିଲେ । ତେବେ ବିଦ୍ୟୁତ ସଂଯୋଗ କଟାଯାଇ ପାରି ନ ଥିବାରୁ 3 ଘଣ୍ଟା ପରେ ଉଚ୍ଚ କର୍ତ୍ତୃପକ୍ଷ ପହଞ୍ଚି ବିବ୍ୟୁତ ସଂଯୋଗ କାଟିଥିଲେ । ଯାହା ପରେ ନିଆଁକୁ ଆୟତ୍ତ କରାଯାଇଥିବା ସୂଚନା ମିଳିଛି । ତେବେ କେଉଁ କାରଣରୁ ବଗିରେ ନିଆ ଲାଗିଥିଲା ତାହା ସ୍ପଷ୍ଟ ହୋଇ ନାହିଁ ।
ଟ୍ରେନଟି ଯାଉଥିବା ବେଳେ ବଗିରୁ ପ୍ରଥମେ ଧୂଆଁ ବାହାରୁଥିବା ଲୋକେ ଦେଖିଥିଲେ ପରେ ଏହି ବଗିରୁ ଧୂଆଁର ପରିମାଣ ବଢି଼ ଚାଲିଥିଲା । ଲୋକେ ରେଳବାଇ କର୍ତ୍ତୃପକ୍ଷଙ୍କୁ ଖବର ଦେବାରୁ ଗୋଡଭଗା ଷ୍ଟେସନରେ ଟ୍ରେନଟିକୁ ଷ୍ଟେସନ ମାଷ୍ଟର ଅଟକାଇ ଦମକଳ ବିଭାଗକୁ ଡକାଇଥିଲେ ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
