ବରଗଡ଼: ଉପନିର୍ବାଚନରେ ବିଜେଡ଼ି ଦଳର ପ୍ରଚାର ପ୍ରସାର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୁଇ ଦିନ ଧରି ବିଜେପୁର ଅଞ୍ଚଳରେ ପ୍ରଚାର କରିଥିଲେ । ସେ ନିଜେ ଲୋକଙ୍କ ପାଖକୁ ଆସିଥିବାରୁ ଲୋକଙ୍କୁ ସବୁ ସ୍ଥାନରେ ‘ଆପଣ ମାନେ ଖୁସି ତ ?’ ବୋଲି କହୁଥିଲେ ଏବଂ ଲୋକେ ଏହାକୁ ବେଶ ମଜାରେ ଉପଭୋଗ କରୁଥିଲେ । କିନ୍ତୁ ଗାଇସିଲେଟ ବ୍ଲକ ଅନ୍ତର୍ଗତ ଡାଙ୍ଗବାହାଲ ଗ୍ରାମବାସୀଙ୍କୁ ନବୀନଙ୍କ ଏହି କଥା କଟା ଘା’ରେ ଚୂନ ପରି ଲାଗିଥିଲା ।
ଗାଇସିଲେଟ ବ୍ଲକ ଅନ୍ତର୍ଗତ ଡାଙ୍ଗବାହାଳ ଗ୍ରାମରେ ଦୀର୍ଘ 12 ବର୍ଷ ହେଲା ଫ୍ଲୋରାଇଡ଼ ପାଣିର ଶିକାର ହୋଇଛନ୍ତି ଅନେକ ଲୋକ । ଫ୍ଲୋରୋସିସ ରୋଗରେ ଆକ୍ରାନ୍ତ ହୋଇ ଅଳ୍ପ ବୟସର ବହୁ ଶିଶୁ, ଯୁବକ, ଯୁବତୀଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବା ସହ ଅନେକଙ୍କ ମୃତ୍ୟୁ ହୋଇଛି । ଏଠାକାର ନେତା ଓ ମନ୍ତ୍ରୀ ସମସ୍ତେ ଡାଙ୍ଗବାହାଲ ଗ୍ରାମର ସମସ୍ୟା ବିଷୟରେ ଅବଗତ ଅଛନ୍ତି ମାତ୍ର ସବୁ ଜାଣି ଅଜାଣ ହୋଇଛନ୍ତି ସମସ୍ତେ।
ଦୀର୍ଘ ବର୍ଷ ହେଲା ମାଟି ଖୋଳାଯାଇ ପାଣିପାଇପ ପୋତା ଯାଇଛି ମାଟିତଳେ । ହେଲେ ଏତିକିରେ ବନ୍ଦ ହୋଇ ରହିଛି କାମ । ଏହା ମଧ୍ୟରେ ଚାରିଜଣଙ୍କ ଜୀବନ ଚାଲି ଯାଇଥିବା ବେଳେ ବହୁ ଲୋକେ ଶଯ୍ୟାଶାୟୀ ହୋଇ ପଡିରହିଛନ୍ତି । ନା ଏଠାକାର ସମସ୍ୟା କାହାକୁ ଦେଖାଯାଉଛି ନା କୌଣସି ରାଜନେତା ଏହାର ସମାଧାନ କରୁଛନ୍ତି । ଏପରି ପରିସ୍ଥିତିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଡାଙ୍ଗବାହାଲ ଗ୍ରାମକୁ ଆସି ତାଙ୍କର ନିର୍ବାଚନୀ ପ୍ରଚାର କରି ଫେରିଯାଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଗ୍ରାମକୁ ଆସିଲେ ଗ୍ରାମବାସୀଙ୍କ ସମସ୍ତ ସମସ୍ୟା ଦୂର ହୋଇଯିବ ବୋଲି ଲୋକେ ଆଶା କରିଥିବା ବେଳେ କିନ୍ତୁ ମୁଖ୍ୟମନ୍ତ୍ରୀ ‘ ଆପଣ ମାନେ ଖୁସି ତ ମୁଁ ବି ବହୁତ ଖୁସି ’ କେବଳ ଏହି ଦୁଇ ଧାଡ଼ି କହି ଚାଲିଯାଇଛନ୍ତି ।
ତେବେ ସତରେ କେବେ ଡାଙ୍ଗବାହାଲବାସୀ ଖୁସି ହୋଇ ପାରିବେ ତାହା ସମୟ କହିବ ।
ବରଗଡରୁ ରାଜେଶ ସରାପ, ଇଟିଭି ଭାରତ
