ବରଗଡ: ନିଖୋଜ ନାବାଳିକାଙ୍କ ମୃତଦେହ ପରିତ୍ୟକ୍ତ କୂଅରୁ ଉଦ୍ଧାର । ସୋମବାର ସକାଳୁ ବିଜେପୁର ଥାନା ଅନ୍ତର୍ଗତ ଖରମୁଣ୍ତା ଗ୍ରାମର ଜଣେ ନାବାଳିକାଙ୍କ ମୃତଦେହ ଏକ କୂଅରୁ ଉଦ୍ଧାର କରାଯାଇଛି । ଏହି ଘଟଣାରେ ବିଜେପୁର ପୋଲିସ ଜଣେ ବ୍ୟକ୍ତିଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।
ସୂଚନା ଅନୁଯାୟୀ, ଖରମୁଣ୍ତା ଗ୍ରାମର ତେଜରାଜ ପୋଢଙ୍କ ୧୬ ବର୍ଷୀୟା ନାବାଳିକା ଝିଅ ଏପ୍ରିଲ ୧ ତାରିଖ ଠାରୁ ନିଖୋଜ ଥିଲେ । ଏ ନେଇ ତେଜରାଜ ବିଜେପୁର ଥାନାରେ ଲିଖିତ ଅଭିଯୋଗ କରିଥିଲେ । ସୋମବାର ସକାଳେ ଗ୍ରାମର ଏକ କୂଅରୁ ନାବାଳିକା ଝିଅର ମୃତଦେହ ଦେଖିବାକୁ ମିଳିଥିଲା । ଗ୍ରାମବାସୀ ପୋଲିସକୁ ଖବର ଦେବାରୁ ଘଟଣାସ୍ଥଳକୁ ବିଜେପୁର ପୋଲିସ ପହଞ୍ଚି ତଦନ୍ତ ଚାଲିଛି ଏବଂ ଅଗ୍ନିଶମ ବିଭାଗ ସହାୟତାରେ ପରିତ୍ୟକ୍ତ କୂଅରୁ ମୃତ ନାବାଳିକାଙ୍କ ମୃତଦେହ ଉଦ୍ଧାର କରାଯାଇଛି ।
ବିଜେପୁର ଥାନା ପକ୍ଷରୁ ଅଧିକ ତଦନ୍ତ ଜାରି ରଖିଛନ୍ତି । ଏହି ଘଟଣାରେ ହତ୍ୟାକାଣ୍ଡ ସନ୍ଦେହରେ ଜଣକୁ ଅଟକ ରଖି ଅଧିକ ତଦନ୍ତ ଜାରି ରଖିଥିବା ପଦ୍ମପୁର ଏସଡିପିଓ ପ୍ରକାଶ କରିଛନ୍ତି ।
ବରଗଡରୁ ରାଜେଶ ସରାପ,ଇଟିଭି ଭାରତ
