ବରଗଡ: ଗଞ୍ଜେଇ ରାକେଟର ପର୍ଦ୍ଦାଫାଶ କଲେ ସ୍ଥାନୀୟ ଯୁବକ । ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଅଞ୍ଚଳରେ ଲକଡାଉନ ସମୟରେ ମଧ୍ୟ ନିଶା କାରବାର ବ୍ୟାପାରକୁ ପୋଲିସ ଅଙ୍କୁଶ ଲଗାଇବାରେ ବିଫଳ ହେବାପରେ କିଛି ସ୍ଥାନୀୟ ଯୁବକ ବେଆଇନ ଗଞ୍ଜେଇ ରାକେଟ ଚଳାଇଥିବା ଯୁବକଙ୍କୁ କାବୁ କରି ପୋଲିସକୁ ଜିମା କରାଇଛନ୍ତି । ଏଭଳି ଘଟଣା ଘଟିଛି ଜଗଦଲପୁର ଥାନା ଅନ୍ତର୍ଗତ ପୁଟୁକା ଗ୍ରାମରେ ।
ଜଗଦଲପୁର ଥାନା ଅନ୍ତର୍ଗତ ପୁଟୁକା ଗ୍ରାମ ଓଡିଶା ଏବଂ ଛତିଶଗଡ ସୀମାନ୍ତରେ ରହିଥିବା ବେଳେ ଏହି ରାସ୍ତାଦେଇ ପ୍ରତିଦିନ ଛତିଶଗଡ ଅଞ୍ଚଳରୁ ବ୍ୟାପକ ମାତ୍ରାରେ ଗଞ୍ଜେଇ ଚୋରା ଚାଲାଣ ହୋଇ ରାଜ୍ୟକୁ ପ୍ରବେଶ କରାଯାଇଥାଏ । କିନ୍ତୁ ସ୍ଥାନୀୟ ଲୋକେ ଏନେଇ ପୋଲିସକୁ ବାରମ୍ବାର ଅଭିଯୋଗ କରିବା ସର୍ତ୍ତ୍ବେ ଜଗଦଲପୁର ପୋଲିସ ଅଭିଯୋଗକୁ ଅଣଦେଖା କରୁଥିଲେ ।
ଶେଷରେ ବାଧ୍ୟ ହୋଇ ଏଠାକାର ଯୁବକ ମାନେ ଏକତ୍ରିତ ହୋଇ ଏହି ନିଶାକାରବାର ଚଳାଇଥିବା ଦୁଇଜଣ ଗଞ୍ଜେଇ ବ୍ୟାପାରୀଙ୍କୁ କାବୁ କରିଥିଲେ । ଉକ୍ତ ବ୍ୟାପାରୀଙ୍କ ଠାରୁ ୫ କେଜି ଗଞ୍ଜେଇ ଜବତ କରାଯାଇଥିବା ବେଳେ ଦୁଇ ଗଞ୍ଜେଇ ବ୍ୟାପାରୀଙ୍କୁ ଯୁବକମାନେ ପୋଲିସକୁ ହସ୍ତାନ୍ତର କରିଥିଲେ ।
ବରଗଡରୁ ରାଜେଶ ସରାପ, ଇଟିଭି ଭାରତ
