ବରଗଡ: ଜିଲ୍ଲା ପୋଲିସ ହାତରେ ଧରାପଡିଲା ପେଷାଦାର ଅପରାଧୀ ଚିଆଁ ଓରଫ ବୁଦ୍ଧଦେବ ବିଶ୍ଵାଳ | ଗତ ଜୁନ ମାସରେ ଜମୁଡାରେ ହୋଇଥିବା ହତ୍ୟାକାଣ୍ଡ ଘଟଣାର ମୁଖ୍ୟ ଅପରାଧୀ ଚିଆଁ ଫେରାର ଥିବାବେଳେ ବରଗଡ ପୋଲିସ ଘୁଲିପାଳି ନିକଟରେ ଚିଆଁକୁ କାବୁ କରିବାରେ ସଫଳ ହୋଇଛି |
ବରଗଡ ଟାଉନ ଥାନା ଅନ୍ତର୍ଗତ ଜମୁଡା ଗାଁରେ ଗତ ଜୁନ ମାସ ୧୦ ତାରିଖରେ ହୋଇଥିବା ହତ୍ୟାକାଣ୍ଡ ଘଟଣାରେ ଜିଲ୍ଲା ପୋଲିସ ମାତ୍ର ୧୯ ଦିନ ମଧ୍ୟରେ ୫ ଜଣ ଅପରାଧୀଙ୍କୁ ଭିନ୍ନ ଭିନ୍ନ ରାଜ୍ୟରୁ ଧରିଥିଲା । ଏହି ହତ୍ୟାକାଣ୍ଡ ଘଟଣାର ପର୍ଦ୍ଦାଫାସ କରିବା ସହ ଅପରାଧୀଙ୍କୁ ସୁରକ୍ଷା ଯୋଗାଉଥିବା ସ୍ଥାନୀୟ ଅଞ୍ଚଳର ପ୍ରସିଦ୍ଧ ତବଡା ବାବାକୁ ମଧ୍ୟ ପୋଲିସ କାବୁ କରିଥିଲା । କିନ୍ତୁ ଅନ୍ୟ ଏକ ଅପରାଧି ଚିଆଁ ଫେରାର ଥିଲା ବେଳେ ପୋଲିସ ଚିଆଁକୁ ଧରିବା ପାଇଁ ଉଦ୍ୟମ ଜାରି ରଖିଥିଲା |
ବରଗଡ ଘୁଲିପାଳି ଠାରେ ଚିଆଁ ଡକାୟତି କରିବା ଯୋଜନାରେ ଆସିଥିବା ଗୁଇନ୍ଦା ସୂତ୍ରରୁ ଖବର ପାଇଥିଲା ବରଗଡ ପୋଲିସ । ତେବେ ଚିଆଁ ପୋଲିସକୁ ଦେଖି ଦୌଡି ପଳାଉଥିଲା ବେଳେ ପୋଲିସ ଗୋଡେଇ ଗୋଡେଇ ତାକୁ କାବୁ କରିଥିଲା । ତେବେ ପୋଲିସ ଚିଆଁ ଠାରୁ ଏକ ଦେଶୀ ବନ୍ଧୁକ, ଗୋଟିଏ ଜୀବନ୍ତ ଗୁଳି ଓ 4 ଗୋଟି ମୋବାଇଲ ଜବତ କରିଛି |
ଚିଆଁ ନାଁରେ ପୂର୍ବରୁ ମଧ୍ୟ ବରଗଡ ଟାଉନ ଥାନରେ 2ଟି , ଆମ୍ବାଭୋନାରେ ଗୋଟିଏ , ରେଙ୍ଗାଳୀ ଥାନାରେ ଗୋଟିଏ ଓ ଜମନକିରା ଥାନାରେ ମଧ୍ୟ ବହୁ ମାମଲା ରହିଛି |
ସୂଚନାଥାଉକି, ଜମୁଡା ଗାଁର ହିରାଲାଲ ମହାନ୍ତଙ୍କ ଘରକୁ ଡକାୟତି କରିବା ଉଦ୍ଦେଶ୍ୟରେ ୫ଜଣ ଡକାୟତ ଯାଇଥିଲେ । ଛାତ ଉପରେ ଶୋଇଥିବା ହିରାଲାଲାଙ୍କର ଶଳା ବସନ୍ତ ପ୍ରଧାନଙ୍କୁ ଡକାୟତ ଦଳ ହତ୍ୟା କରିଥିଲେ | ଏହି ଘଟଣାରେ ସମସ୍ତ ଅଭିଯୁକ୍ତ ଜେଲରେ ଥିବା ବେଳେ ଝାରସୁଗୁଡା ଜିଲ୍ଲା ରେଙ୍ଗାଳୀ ଥାନା ଅନ୍ତର୍ଗତ ଧୁଲୁଣ୍ଡା ଗାଁର ବୁଦ୍ଧଦେବ ବିଶ୍ଵାଳ ଓରଫ ଚିଆଁ ଆଜି ପୋଲିସ ହାତରେ ଧରାପଡିଛି |
ବରଗଡରୁ ରାଜେଶ ସରାପ, ଇଟିଭି ଭାରତ
