ବରଗଡ: ଜିଲ୍ଲା ସ୍ୱାସ୍ଥ୍ୟ ବିଭାଗ ପାଇଁ ଲଜ୍ଜାର ବିଷୟ ହୋଇଛି ଆଜିର ହୃଦୟ ବିଦାରକ ଘଟଣା | କୋରୋନା ମହାମାରୀ ପାଇଁ ଲୋକଙ୍କ ସୁରକ୍ଷା ଦୃଷ୍ଟିରେ ସାରା ରାଜ୍ୟରେ ସରକାର କୋଭିଡ ହସ୍ପିଟାଲ ନିର୍ମାଣ କରିସାରିଥିବା ବେଳେ କରୋନାରେ ମୃତ ବ୍ୟକ୍ତିଙ୍କ ମୃତଦେହ ସତ୍କାର ମଧ୍ୟ ଜିଲ୍ଲା ପ୍ରଶାସନର ତଦାରଖରେ କରାଯିବ ବୋଲି ନିୟମ କରିଛନ୍ତି ସରକାର | ହେଲେ ବରଗଡ ଜିଲ୍ଲା ପ୍ରଶାସନ କୋରୋନା ମହାମାରୀ ପାଇଁ କେତେ ସଜାଗ ରହିଛି ଏବଂ ବରଗଡରେ କୋରୋନାରେ ମୃତ ବ୍ୟକ୍ତିଙ୍କ ମୃତଦେହ ସତ୍କାର ଉପରେ ପ୍ରଶାସନ କେତେ ପ୍ରସ୍ତୁତ ଅଛି ତାହା ଆଜି ପଦାକୁ ପଡିଯାଇଛି |
ଜଣେ ପ୍ରବାସୀଙ୍କ ମୃତ୍ୟୁ ହୋଇଥିବା ଘଟଣାରେ କୋରୋନାରେ ମୃତ୍ୟୁ ହୋଇଥିବା ସନ୍ଦେହ ମାତ୍ର କରାଯାଇଥିଲା ଏବଂ ମୃତଦେହକୁ 20 ଘଣ୍ଟା ଧରି କେହି ହାତ ମାରିନଥିଲେ | ଅନାଥ ହୋଇ ପଡି ରହିଥିଲା ମୃତଦେହ | ତେବେ ଯଦି ବରଗଡରେ ମଧ୍ୟ କୋରୋନା ରୋଗରେ ମୃତ୍ୟୁ ହୁଏ ତାହାହେଲେ କଣ ଏମିତି ପଡିରହିବା ମୃତ ଦେହ ? ବରଗଡ ଜିଲ୍ଲା ମୁଖ୍ୟ ଚିକିତ୍ସାଳଯରେ ଶବକୁ ବ୍ୟବଚ୍ଛେଦ କରିବା ପାଇଁ ସ୍ଵିପରମାନେ 5 ହଜାର ଟଙ୍କା ଦାବି କରିଥିଲେ ଯାହାକି ବର୍ତମାନ ପରି ମହାମାରୀ ସ୍ଥିତିରେ ମଣିଷ ପାଇଁ ଲଜ୍ଜାଜନକ ଘଟଣା ଅଟେ |
ତେବେ ବରଗଡରେ କୋରୋନା ରୋଗରେ ମୃତ୍ୟୁ ହେଲେ ଜିଲ୍ଲା ପ୍ରଶାସନ କେତେ ପ୍ରସ୍ତୁତ ଅଛି ତାହାର ନଗ୍ନ ନମୁନା ଆଜି ଲୋକ ଲୋଚନକୁ ଆସିଯାଇଛି | ଏବଂ ଏହା ବର୍ତ୍ତମାନ ଏକ ଚିନ୍ତାର ବିଷୟ ହୋଇଛି ଯେ ଆଗକୁ ମହାମାରୀ ଭୟାବହ ରୂପ ନେଲେ କିପରି କରାଯିବ ମୃତଦେହ ସତ୍କାର ତାହା ଏବେ ପ୍ରଶ୍ନବାଚୀ ହୋଇ ରହିଛି |
ବରଗଡରୁ ରାଜେଶ ସରାପ, ଇଟିଭି ଭାରତ
