ବରଗଡ: କୋରୋନା ମହାମାରୀ ସମୟରେ ଅର୍ଥଲଗାଣକାରୀ ସଂସ୍ଥାଗୁଡିକୁ ଋଣ ଅର୍ଥ ଆଦାୟ ନକରିବା ପାଇଁ ନିର୍ଦ୍ଦେଶ ଦେଇଥିଲା ପ୍ରଶାସନ । ତଥାପି ପ୍ରଶାସନର କଟକଣାକୁ ଖାତିର ନକରି ଶନିବାର ପଦ୍ମପୁର ଉପଖଣ୍ଡ ଅଞ୍ଚଳରେ ଜଣେ ଫାଇନାନ୍ସ କମ୍ପାନୀର ଏଜେଣ୍ଟ ପଶି ଅର୍ଥ ଆଦାୟ କରିଥିବା ସ୍ଥାନୀୟ ଲୋକେ ଅଭିଯୋଗ କରିଥିଲେ । ଏହି ଅଞ୍ଚଳରେ କୋରୋନା ଆକ୍ରାନ୍ତ ଚିହ୍ନଟ ହୋଇଥିବାରୁ ଅଞ୍ଚଳକୁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଥିଲା ।
ନିୟମ ଅନୁଯାୟୀ କଣ୍ଟେନମେଣ୍ଟ ଜୋନରେ ନା କେହି ପ୍ରବେଶ କରିପାରିବେ ନା କେହି ଏହି ଜୋନରୁ ବାହାରକୁ ଯାଇପାରିବେ ନାହିଁ । ତଥାପି ଫାଇନାନ୍ସ କମ୍ପାନୀର ଏଜେଣ୍ଟ ଜରବଦସ୍ତି ପଶି ଘରକୁ ଘର ବୁଲି ଋଣ ଅର୍ଥ ଆଦାୟ କରୁଥିଲେ । ଏନେଇ ସ୍ଥାନୀୟ ଲୋକେ ଅଭିଯୋଗ କରିବା ପରେ ତୁରନ୍ତ ପଦ୍ମପୁର ଏନଏସି ଇଓ ଜୟନ୍ତ ସାହୁ ଏଜେଣ୍ଟକୁ ଧରି ଥାନାରେ ଦେଇଥିଲେ ।
ତେବେ ଲକଡାଉନ ସମୟରେ ଅନେକଙ୍କ ବ୍ୟବସାୟ ଓ ରୋଜଗାର ପ୍ରଭାବିତ ହୋଇଥିବାରୁ ସମସ୍ତ ଜିଲ୍ଲା ପ୍ରଶାସନ କୌଣସି କମ୍ପାନୀ ଗ୍ରାହକଙ୍କ ଉପରେ ଋଣ ପୈଠ ପାଇଁ ଚାପ ପ୍ରୟୋଗ ନକରିବା ପାଇଁ ନିର୍ଦ୍ଦେଶ ଦେଇଥିଲେ । କଡା ନିର୍ଦ୍ଦେଶ ସତ୍ତ୍ବେ ସମ୍ପୃକ୍ତ ଏଜେଣ୍ଟଙ୍କ ମନମାନି କରି ଋଣ ଆଦାୟ କରିଥିଲେ । ସେ ପୁଣି ଏକ କଣ୍ଟେନମେଣ୍ଟ ଜୋନରୁ । ଏଥିପାଇଁ ତାଙ୍କୁ ପୋଲିସକୁ ହସ୍ତାନ୍ତର କରାଯାଇଥିବା ଜଣାପଡିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
