ବରଗଡ : ସାର କଳା ବଜାରୀ କରାଯାଉଥିବାବେଳେ ପ୍ରଶାସନ ପକ୍ଷରୁ ଚାଷୀଙ୍କୁ ସାର ଯୋଗାଇ ଦିଆଯାଉନ ଥିବା ଅଭିଯୋଗ ହୋଇଛି । ଏନେଇ ଆଜି (ବୁଧବାର) ଚାଷୀଙ୍କ ତରଫରୁ ରାସ୍ତାରୋକ କରାଯାଇଛି । ସ୍ଥାନୀୟ ଅମ୍ବାପାଳି ଠାରେ ଶତାଧିକ ଚାଷୀ ବରଗଡ ବଲାଙ୍ଗୀର ରାସ୍ତା ଅବରୋଧ କରି ଆନ୍ଦୋଳନ କରିଛନ୍ତି ।
ଦୀର୍ଘ 5 ଘଣ୍ଟା ଧରି ଆନ୍ଦୋଳନ କରାଯିବା ପରେ ମଧ୍ୟ ଚାଷୀଙ୍କ ସମସ୍ଯାର ସମାଧାନ ନ ହେବାରୁ ରାତ୍ରି ପର୍ଯ୍ୟନ୍ତ ଚାଷୀ ମାନେ ରାସ୍ତାରେ ଆନ୍ଦୋଳନ ଜାରି ରଖିଛନ୍ତି । ସୂଚନା ଅନୁଯାୟୀ ବରଗଡରେ ସରକାରୀ ଦାମରୁ 200 ଟଙ୍କାରୁ 500 ଟଙ୍କା ପର୍ଯ୍ୟନ୍ତ ଅଧିକ ଟଙ୍କାରେ ସାର ବିକ୍ରି କରାଯାଉଥିବା ବେଳେ ଖୁଣ୍ଟାପାଳି ଗ୍ରାମର ଚାଷୀ ଏହାର ବିରୋଧ କରିଥିଲେ । ମାତ୍ର ବାରମ୍ବାର କୃଷି ଅଧିକାରୀ ଏବଂ cso ଅଫିସରେ ଅଭିଯୋଗ କରିଆସୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିଲା ।
ଏହାବି ପଢନ୍ତୁ : କ୍ଷେତରେ ଜରୁରୀ ଅବତରଣ କଲା ବାୟୁସେନା ହେଲିକପ୍ଟର
ହେଲେ ବୁଧବାର ଖୁଣ୍ଟାପାଳି ଅଞ୍ଚଳର ବହୁ ଚାଷୀ ଉତ୍ୟକ୍ତ ହୋଇ କୃଷି ଅଫିସକୁ ଘେରାଉ କରିଥିଲେ । ପରେ ଅମବାପାଳି ସ୍ଥିତ ସାର ଗୋଦାମ ସମ୍ମୁଖରେ ଆନ୍ଦୋଳନ କରି ରାସ୍ତା ଜାମ କରି ରଖିଛନ୍ତି । ଜିଲ୍ଲା ପ୍ରଶାସନ ସାର ପଯ୍ୟାପ୍ତ ପରିମାଣରେ ଗଚ୍ଛିତ ଥିବା କହୁଥିବା ବେଳେ କିନ୍ତୁ ଚାଷୀଙ୍କୁ ସାର ଯୋଗାଇବାରେ ଅସମର୍ଥ ହେଉଛି । ଫଳରେ ଚାଷୀମାନେ ଉତ୍ୟକ୍ତ ହୋଇ ଆଜି ହୋଇ ଆନ୍ଦୋଳନକୁ ଓହ୍ଲାଇଛନ୍ତି ।
ବରଗଡରୁ ରାଜେସ ସରାପ, ଇଟିଭି ଭାରତ
