ବରଗଡ: ଧାନ ବିକ୍ରିକୁ ନେଇ ପୁଣି ଦାନା ବାନ୍ଧୁଛି ପଶ୍ଚିମ ଓଡିଶାରେ ଆନ୍ଦୋଳନ । ଗତ କିଛିଦିନ ତଳେ ଟୋକନ ବ୍ୟବସ୍ଥାକୁ ନେଇ ଚାଷୀ ଆନ୍ଦୋଳନକୁ ଓହ୍ଲାଇଥିଲେ । ହେଲେ ସରକାର ଯେଣେତେଣେ ଆନ୍ଦୋଳନକୁ ପ୍ରଶମିତ କରିବାରେ ସଫଳ ହୋଇଥିଲେ । ହେଲେ ଯେଉଁ ପ୍ରତିଶୃତି ଦେଇ ସରକାର ଆନ୍ଦୋଳନକୁ ପ୍ରଶମିତ କରିବାରେ ସଫଳ ହେଲେ ଏବେ ସେହି ପ୍ରତିଶୃତି ରଖିବାରେ ସରକାର ବିଫଳ ହୋଇଛନ୍ତି । ଫଳରେ ବରଗଡରେ କୁହୁଳୁଛି ଆନ୍ଦୋଳନ ।
ଯାହାକୁ ନେଇ ଚାଷୀ ଏବେ ଆନ୍ଦୋଳନ କରିବାକୁ ପ୍ରସ୍ତୁତ ହେଉଛନ୍ତି । ଘଟଣା ଅନୁସାରେ ଧାନ ବିକ୍ରିରେ ଟୋକନ ବ୍ୟବସ୍ଥା ସରଳ କରିବା ସହ ଚାଷୀଙ୍କ କୌଣସି ସମସ୍ୟା ହେବ ନାହିଁ ବୋଲି ସରକାରଙ୍କ ପ୍ରତିନିଧି ଭାବେ ଚାଷୀଙ୍କ ସହ ଆଲୋଚନା କରିଥିବା ନେତା କହିଥିଲେ । ବରଗଡ ବିଧାୟକ ଦେବେଶ ଆଚାର୍ଯ୍ୟ, ମନ୍ତ୍ରୀ ସୁଶାନ୍ତ ସିଂ ଚାଷୀ ମାନଙ୍କୁ ଟୋକନ ଲାଗୁକରାଯିବ ନାହିଁ ଏବଂ ମାର୍କେଟ ରେ ପଡିଥିବା ଧାନବସ୍ତା ସବୁ ଶୀଘ୍ର ଉଠାଯିବ ବୋଲି ପ୍ରତିଶ୍ରୁତି ଦେବାପରେ ଚାଷୀମାନେ ଆନ୍ଦୋଳନରୁ ଓହରିଥିଲେ ମାତ୍ର ଗୋଟିଏ ଦିନ ପରେ ନେତା ଓ ମନ୍ତ୍ରୀଙ୍କ ମିଥ୍ୟା ପ୍ରତିଶ୍ରୁତି ପଦାରେ ପଡିଥିଲା । ସମସ୍ତ ମଣ୍ଡିରେ ଟୋକନ ବ୍ୟବସ୍ଥା ଲାଗୁକରିବା ସହିତ ଚାଷୀଙ୍କ ଆଖିର ସ୍କାନ କରାଯାଉଛି ଯାହାକି ବାଧ୍ୟତାମୂଳକ । ଫଳରେ ବହୁ ମଣ୍ଡି ମାନଙ୍କରେ ଚାଷୀ ତାଲା ପକାଇ ଆନ୍ଦୋଳନ କରୁଥିବା ବେଳେ ମଣ୍ଡି ଚାରିଆଡେ ପଡିରହିଛି ଚାଷୀଙ୍କ ହଜାର ହଜାର ଧାନ ବସ୍ତା ।
ତେବେ ସରକାରଙ୍କ ଏପରି ଦୋମୁହାଁ ନୀତିକୁ ଚାଷୀ ନିନ୍ଦା କରିବା ସହିତ ପୁଣି ତୀବ୍ର ଆନ୍ଦୋଳନ ପାଇଁ ଜିଲ୍ଲାର ଚାଷୀ ପ୍ରସ୍ତୁତ ହେଉଥିବା ବେଳେ ଏଥର କିନ୍ତୁ ଜିଲ୍ଲା ପ୍ରଶାସନ କିମ୍ବା ନେତା ମନ୍ତ୍ରୀ ଆଉ ଭକୁଆ ବନାଇ ପାରିବେ ନାହିଁ ଏବଂ ଆନ୍ଦୋଳନ ଉଗ୍ରରୂପ ନେବ ବୋଲି କହିଛି କୃଷକ ସଙ୍ଗଠନ ।
ବରଗଡରୁ ରାଜେସ ସରାପ, ଇଟିଭି ଭାରତ
