ବରଗଡ: ପୁଣି ସାମ୍ନାକୁ ଆସିଲା ଚାଷୀ ଆତ୍ମହତ୍ୟା ଘଟଣା । ଫସଲ ବିକ୍ରି କରି ନ ପାରି ବିଷ ପିଇଲା ଚାଷୀ । ଏଭଳି ଅଭିଯୋଗ ଆସିଛି ବରଗଡ ଜିଲ୍ଲାର ହିଲ୍ଲିପାଲିର ଟାଙ୍ଗରଟିକ୍ରାରୁ । ସୂଚନା ଅନୁଯାୟୀ ବରଗଡ ଜିଲ୍ଲା ଅତାବିରା ବ୍ଲକ ଅନ୍ତର୍ଗତ ହିଲ୍ଲିପାଲିର ଟାଙ୍ଗରଟିକ୍ରାର 62 ବର୍ଷୀୟ ଚାଷୀ ବୃନ୍ଦାବନ ଭୁଏ । ଗତ ରବି ଋତୁରେ 10 ଏକର ଜମିରେ ଧାନ ଚାଷ କରିଥିଲେ । ଚାଷ ପାଇଁ ଆଣିଥିବା ଋଣ ବୃନ୍ଦାବନ ପରିଶୋଧ କରିପାରି ନଥିଲେ ।
କାହିଁକିନା ଅମଳ ହୋଇଥିବା ଧାନ ବିକ୍ରି ହୋଇପାରି ନଥିଲା । ଯାହାକୁ ନେଇ ସେ ଚିନ୍ତାରେ ରହୁଥିଲେ । ଧୀରେ ଧୀରେ ତାଙ୍କର ଆର୍ଥିକ ଅବସ୍ଥା ଶୋଚନୀୟ ହେବାରୁ ଶେଷରେ ସେ ମାନସିକ ଭାରସାମ୍ୟ ହରାଇ କୀଟନାଶକ ପିଇଦେଇଥିଲେ । ଗୁରୁତର ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । 62 ବର୍ଷର ମୃତ ଚାଷୀଙ୍କ ୩ ପୁଅ ଏବଂ ୨ ଝିଅ ରହିଥିବା ବେଳେ ତାଙ୍କ ବଡ ପୁଅ ତାମିଲନାଡୁକୁ ଦାଦନ ଖଟିବାକୁ ଯାଇଛନ୍ତି ।
ତେବେ ସରକାରଙ୍କ ଟୋକନ ସିଷ୍ଟମ ଏବଂ ଧାନ ବିକ୍ରିର ତ୍ରୁଟିପୂର୍ଣ୍ଣ ବ୍ୟବସ୍ଥା କାରଣରୁ ବୃନ୍ଦାବନ ଆତ୍ମହତ୍ୟା କରିବାକୁ ବାଧ୍ୟ ହୋଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି।
ବରଗଡରୁ ରାଜେସ ସରାପ , ଇଟିଭି ଭାରତ
